核戰爭，簡稱核戰，係指用核武嚟打嘅仗。由於用核武殺人會一次過死好多人，而且地球上嘅核武加埋夠殺晒全人類有凸，所以核戰嘅可能性好多時會同世界末日、人類文明滅亡擺埋一齊嚟講。
人類史上，只係出現過兩次有人用核武嚟打仗，就係第二次世界大戰到尾，美軍喺廣島同長崎掟原子彈，逼日本投降。
二戰完咗之後，一路都冇出現過核戰，不過冷戰期間全世界都一路驚會發生核戰。1947年，世界末日鐘成立，係原子科學家評估人類文明距離打核戰有幾遠。
