標準軌

標準軌係國際鐵路協會喺1937年制定嘅1435mm（等於英制嘅4呎8吋半）標準軌距，闊過標準軌嘅鐵軌稱為寬軌，窄過標準軌嘅稱為窄軌。世界上大概60%嘅鐵路嘅軌距係標準軌距。

歷史

標準軌最先由使用鐵路嘅英國提出。設計同埋建造史托頓及達靈頓鐵路嘅英國工程師佐治·史提芬遜提出4呎8½吋嘅軌距，並成功說服到火車製造商生產4呎8½吋（即係1435毫米）軌距嘅機車同車輛。由於史提芬遜成功設計嘅鐵路係眾人嘅模仿對象，令到呢個軌距流行。1845年英國皇家專員建議用4呎8½吋做標準軌距。1846年英國國會通過法案，要求將來所有嘅鐵路都使用標準軌。除咗英國嘅大西部鐵路（Great Western Railway）係用寬軌之外，英國嘅主要鐵路都係標準軌。大西部鐵路亦喺1892年改成標準軌。

有關4呎8½吋軌距嘅來源，有人認為喺古羅馬戰車嘅輪距。但亦有人指出可能係因為早期鐵路的軌道外側距離喺5英呎，而鐵軌頂寬喺1¾英吋，所以內側軌距就係4呎8½吋。

各國應用

内文：軌距

喺傳統鐵路上，世界上大多數國家用標準軌，集中喺西歐、北美、北非、中國。

大部分高鐵技術都基於標準軌開發，世界上已有嘅高速鐵路系統幾乎全部採用標準軌，包括鐵路用窄軌嘅日本、台灣等，以及使用傳統鐵路使用寬軌嘅西班牙、葡萄牙等地。

傳統鐵路用窄軌嘅國家，喺高速鐵路上全部改用標準軌，咁樣做可以提高高速運行下嘅穩定性。

俄羅斯同芬蘭就採用5英尺寬軌高速鐵路，令佢喺境內嘅傳統鐵路軌道兼容。

「標準軌化」係指將窄軌或寬軌改建成標準鐵軌。

出面網頁

• 交通部鐵路改建工程局（台灣）