歲銀

歲銀，又叫歲幣，喺中國有兩個意思。第一就係地方政府每年向朝廷繳納嘅稅，第二就係朝廷每年向外族政權、鄰國繳納嘅財物。

以歲幣換和平

朝廷對外俾歲幣，其實係中國好多朝代既傳統維穩手段。

宋朝

最出名既就係宋朝，宋朝嘅國策就係「以歲幣換和平」，最早係俾遼國，後嚟就係西夏同埋金國。通常係宋朝同鄰國打仗，輸咗或者打到膠著狀態，朝廷用送「歲幣」既方法嚟換取鄰國稱臣，其實係俾錢買面子。

漢朝

不過宋朝唔係中國史上第一個向北方鄰國交歲幣既朝代。朝廷交歲幣，最早發生喺漢朝。漢高祖劉邦帶30萬大軍北伐匈奴，不過居然俾匈奴圍困，劉邦要同匈奴妥協，每年將大量絲綢、棉花、酒同埋糧食俾匈奴。漢朝向匈奴交歲幣既傳統，一直到第七位皇帝，漢武帝劉徹先至停。不過只係停咗冇幾耐，喺光武帝劉秀年間，又向烏桓、鮮卑呢兩個東北政權交歲幣。

明朝

宋朝唔係最後一個向北方鄰國交歲幣嘅朝代。喺明朝，蒙古問題又再困擾朝廷，歲幣又再重新俾朝廷用嚟買和平，叫做「俺答封貢」。「俺答封貢」表面上係明朝冊封咗蒙古首領「俺答汗」，仲每年俾大量「歲賞」佢，實際上就係明朝每年向蒙古繳交歲幣。叫歲幣做「歲賞」，只係為咗面子，掩蓋真相，將個名改咗。去到崇禎年間，一年「歲賞」多達360萬兩銀。