蠄蟝

蠄蟝又寫禽渠，亦叫蟾蜍、蟾諸、癩蝦蟆，係種動物。生物學來講，佢同蛤乸、蛤𧊅都係同一目，叫無尾目。民間以佢背上生癩，有突點爲別，生物學上，無此分別。查實皮上粒粒，唔係病，而係蠄蟝多喺陸上，粒粒同周圍吻合，防天敵捕食。蠄蟝有毒腺退敵。

蠄蟝唔似蛤乸咁蛤蛤聲，而係靜靜哋，唔出聲。而蠄蟝亦唔會跳。

名

蠄蟝、禽渠，係取音，來源不明。≪廣東俗語考≫認爲，蠄蟝本字係蟾蜍。

蟾蜍，古寫蟾諸、詹諸，見於漢時。

癩蝦蟆，俗寫癩蛤蟆，話佢似生癩蝦蟆。人嫌佢醜，明清文學有謂，癩蛤蟆想食天鵝肉。