篾，長而幼嘅帶，同繩似。原本以竹皮整成，或叫竹篾。如今有塑膠做，叫膠篾，或者再精確啲尼龍篾。薄身竹篾用於織竹器，同埋舊時搭棚用來紥實啲竹，家下多數改用膠篾。
厚身篾會用來做外形，好似做燈籠個形咁，今下有時用鐵綫取代。紙紥公仔就只會用竹篾，咁燒咗先會化。紙鷂原本亦用竹篾做架，依家多數用塑膠。
