菲臘六世 (西班牙)

出自維基百科,自由嘅百科全書
(由菲臘皮六世跳轉過嚟)
跳去導覽 跳去搵嘢
Ambox warning blue.svg
呢個人物係用緊西班牙人名:首姓或者父姓(即老豆個姓)係「波旁」,次姓或者母姓(即阿媽個父姓)係「希臘嘅」。
菲臘六世
2019-05-30 Felipe VI of Spain-6121.jpg
西班牙國王
在位2014年6月19號 -
加冕2014年6月19號
前任環·卡洛斯一世
阿斯圖里亞斯親王
在位1977年-2014年6月18號
前任環親王
繼任阿斯圖里亞斯女親王莉安諾

配偶莉迪斯雅王后
子嗣
莉安諾親王
蘇菲亞王女
全名
菲臘·環·帕布略·阿方索·萬聖嘅·德波旁-嘅希臘
儲君莉安諾親王
父王環·卡洛斯一世
母后蘇菲亞王后
出世 (1968-01-30) 1968年1月30號(53歲)
出世地西班牙 西班牙馬德里
簽章

菲臘六世[a](西班牙文:Felipe VI,英文:Philip VI1968年1月30號—),全名菲臘·環·帕布略·阿方索·萬聖嘅·德波旁-嘅希臘(西班牙文:Felipe Juan Pablo Alfonso de Todos los Santos de Borbón y de Grecia),現任西班牙國王,2014年上任至今,係前國王環·卡洛斯一世蘇菲亞王后嘅第三個細路。

菲臘做王儲嗰陣,擁有阿斯圖里亞斯親王嘅頭銜,其他頭銜包括芝羅拿親王維亞拿親王白峰公爵錫維立伯爵等等。

2014年6月2號,環·卡洛斯一世宣布退位,由菲臘繼位。佢喺同年6月19號登基[1]

簡歷[編輯]

早年[編輯]

1969年,菲臘王子同二家姐基斯蒂娜

菲臘六世1968年響馬德里洛雷托聖母療養院出世,係環·卡洛斯一世(當時波旁王朝一個王子)同老婆蘇菲亞王后最細嘅細路,同時係第一個仔[2],上有兩個家姐:大家姐艾連娜同二家姐基斯提娜[3]

佢由馬德里總主教卡斯米路·莫西羅響查瑞拉宮受洗,用嘅水係嚟自約旦河[4]。佢嘅洗禮名「萬聖嘅菲臘·環·帕布略·阿方索」(西班牙文:Felipe Juan Pablo Alfonso de Todos los Santos),包含咗第一任西班牙波旁國王菲臘五世、佢爺爺環·波旁王子、阿公保羅一世(保羅一世嘅希臘名係Paúlos,即西班文名嘅Pablo)同埋太爺阿方索十三世嘅名;而佢仲保留到波旁家族傳統嘅名「萬聖嘅」(De Todos los Santos)。佢嘅教父係爺爺環·波旁同太嫲維多利亞·尤金妮亞[5][6]

菲臘響出世冇耐就已經被立做王子,雖然佢老豆仲未正式係西班牙國王(1969年,佛朗哥先任命環·卡洛斯王子係王位繼承人)。後嚟攝政王佛朗哥響佢差兩個月就滿八歲嗰陣走咗,老豆環·卡洛斯一世正式登基;而佢亦有出席老豆嘅加冕儀式,係佢第一次出席公開活動[2]

1975年,菲臘出席老豆嘅加冕儀式,係佢第一次出席公開活動

1977年,菲臘正式被封做阿斯圖里亞斯親王,即係儲君嘅銜頭[6]。同年5月,佢做咗國王第一步兵團榮譽士兵[7]。同月28號,呢個儀式響步兵營舉行,在場嘅有父王、時任首相同埋幾位部長[8][9]。11月,佢以「阿斯圖里亞斯親王」嘅身份,響可法東加接受致敬[10]

1981年,佢獲勳金羊毛騎士團勳章,由騎士團長(即佢老豆)頒發[5][11]。1986年,當佢18歲生日嗰陣,應憲法要求,佢響西班牙議會宣誓效忠西班牙憲法同埋國王,正式承認佢係王位繼承人嘅身份[3][12]

王儲時代[編輯]

教育同軍事訓練[編輯]

菲臘王子由幼稚園到高中都響Santa María de los Rosales就讀(目前佢兩個女都響度讀書)。之後菲臘升讀加拿大安大略省嘅Lakefield College School讀預科

讀完預科之後,菲臘返嚟西班牙,入讀馬德里自治大學,主修法律;仲讀埋幾頁同經濟科有關嘅嘢。佢仲響佐治城大學Walsh School of Foreign Service攞到國際關係碩士學位。響嗰度,佢亦識咗自己嘅表哥、希臘王儲帕夫羅斯,同佢仲係室友。1995年正式畢業。

因為佢係王位繼承人,父王環卡洛斯一世為佢制定咗一個精心準備嘅軍旅生涯。1985年8月,佢成為薩拉戈薩將軍軍事學院嘅軍官,同年9月開始接受訓練,正式加入軍隊。10月,完成第一期階段訓練。1986年7月,升為海軍同陸軍准尉;同年9月響馬林海軍學校進行海軍訓練,仲加入第三旅。1987年1月,響Juan Sebastián Elcano訓練船上繼續佢嘅海軍訓練生涯,同年7月畀人任命為San Javier空軍將軍學院見習准尉。1987年9月,佢開始咗佢嘅空軍訓練,仲學咗點樣揸戰機。1989年,佢升為陸軍中尉、海軍少尉同埋空軍中尉。1992年升為空軍上尉;1993年,佢升為海軍中尉同埋陸軍上尉。

2000年,佢升為陸軍指揮官、海軍少校同埋空軍指揮官(三者即中國嘅少尉)。2009年,佢進升至陸軍、空軍同海軍嘅中校。

2014年,當佢成為西班牙國王之後,佢成為三軍總司令,同時亦正式退伍,結束29年嘅軍人生涯。

外交活動[編輯]

2002年,菲臘親王同俄羅斯總統普京見面

作為王位繼承人,菲臘承擔咗佢嘅責任,響國家舉行幾多官方活動,經常出席任何同西班牙有關係嘅公開活動。1995年10月,佢代表西班牙對西班牙自治區做咗一系列嘅官方訪問,由華倫西亞自治區開始;佢會定期同憲法機構、政府機關見面,去了解佢哋嘅最新情況;仲會根據憲法要求去出席中央政府同埋自治區搞嘅唔同會議。另外佢亦同好多響政治、經濟、文化等等唔同職業上有好成就嘅同齡人見面。響父王環卡洛斯一世出唔到席嘅時候,佢會代表父王主持向武裝部隊同埋士兵嘅年度派遣報告,同埋參加三軍嘅軍事訓練。

由1996年1月開始,菲臘王儲就代表西班牙響好多拉丁美洲嘅總統就職儀式上出現。響做王儲嘅時代,佢亦訪問過好多拉丁美洲國家,除咗古巴。佢仲響外國嘅西班牙經濟、商業同埋文化利益加埋促進西班牙話嘅流行上發揮咗積極作用。佢成日代表西班牙出席好多世界經濟貿易活動,亦希望起多啲學院同埋多啲大學教授,去鼓勵外國大學多啲研究西班牙史同依家嘅西班牙。

身為王儲嘅菲臘識幾多外國文,除咗母語西班牙文之外,佢仲識加泰羅尼亞文英文法文同少少希臘文

響2004年嘅馬德里三一一連環爆炸案發生之後,佢同佢兩個家姐艾連娜基斯提娜都有出席遊行示威。

公益活動[編輯]

除咗官方活動,菲臘亦係好多基金會同埋協會嘅會長,就好似Codespa基金會,專門資助伊比利亞美洲同埋其他地方嘅經濟同埋社會發展。另外佢仲係由專業人士組成嘅歐洲記者協會西班牙分支嘅會長,另外佢仲係阿斯圖里亞斯親王基金會會長之一,每年都會頒發阿斯圖里亞斯女親王獎(原本叫阿斯圖里亞斯親王獎)。

2001年係國際志願者年,出於菲臘對提高志願者工作嘅重要貢獻,時任聯合國秘書長戈菲安南將佢納入「聯合國傑出人物」。

另外佢仲係美國革命子弟會嘅成員之一。

國王時代[編輯]

2014年6月3號,即傳出環卡洛斯一世要退位之後嘅一日,兩父子現身
菲臘六世(右)同日本首相安倍晉三,2019年

2014年6月2號,環卡洛斯一世宣佈佢諗住退位畀菲臘。由於西班牙憲法冇一個特定嘅退位機制,所以西班牙國會響一日後就開始審議菲臘嘅繼承組織法。呢條法案亦要得到眾議院(即下議院)通過。跟據時任眾議院議長黑素斯·波薩達ー莫里奧嘅講法,菲臘最快可以響同月18號登基做國王。6月4號,西班牙《國家報》報道菲臘真係會響2014年6月18號繼位。

6月19號0時0分,菲臘正式登基,成為西班牙國王菲臘六世;至於環卡洛斯一世就響幾個鐘頭之前已經簽咗退位文件。朝頭早,佢接受咗老豆嘅總司令腰帶之後,就去議會做一場低調嘅儀式,宣誓維護西班牙憲法,由眾議院議長黑素斯宣佈佢正式做國王。同時佢做咗歐洲最後生嘅國王,比荷蘭國王威廉亞歷山大細九個月。佢做咗國王之後,大女莉安諾亦跟住獲封阿斯圖里亞斯女親王;而老豆環卡洛斯一世就會簡中出席下活動同埋做做儀式。

身為西班牙國王,佢響紙上比實際上有更大權力,因為西班牙係君主立憲制嘅國家。佢係憲法保護人,亦要遵守同服從憲法。雖然佢響名義上係最高元首,預期佢會做同佢老豆差唔多嘅嘢,即做一個代表性同儀式性嘅角色,跟政府意見做嘢。佢響登基嗰日嘅演講都有表示咁嘅諗法,話佢係一個「忠實嘅國家元首,每分每秒都準備去聽、理解、提醒同保護市民嘅利益」。但係響《國家報》嘅調查顯示,好多西班牙人都希望國王響政治上扮演一個更大同更重要嘅角色。根據憲法,佢嘅行為係要得到憲法同首相同意,如果唔係佢嘅行為係無效嘅。另外,根據《世界報》嘅問卷調查,佢比佢老豆有更大嘅認可度。

佢響加冕後嘅第一個公開活動,就係同王后一齊表示支持受到恐怖主義恐嚇嘅受害人。2014年6月,佢同王后成為西班牙第一位響王宮中接見LGBT組織嘅王室成員。佢改變咗流程,畀入王宮做嘢宣誓嘅時候唔需要十字苦像或聖經。響佢哋第一次以國王同王后嘅身份出國訪問入面,響6月30日會見咗教宗方濟各。佢哋之後又見咗國務樞機卿伯多祿,由外交次長Antoine Camilleri陪伴左右。同年7月18號,佢第一次出席部長會議

2015年初,佢做咗LGBT雜誌《Ragap》嘅封面人物,係第一位出現響LGBT雜誌封面嘅西班牙國家元首。

同年12月嘅普選,結果係冇一個黨得到組建政府嘅足夠議席;之後黨同黨之間嘅協定失敗。響國王同唔同黨領導人傾咗幾個月後,由於真係冇人可以組建政府,所以菲臘發佈王室命令,要求解散議會,響六個月後再搞多次普選。呢次係西班牙自1978年轉為君主立憲制之後第一次通過憲法第99.5條,而且仲係第一次由國王而唔係首相解散議會。

2017年10月,加泰羅尼亞獨立公投得到過半數同意,自行宣佈獨立。西班牙政府唔承認呢次公投,結果惹嚟加泰嘅人不滿,紛紛上街示威同埋罷工。幾日後,菲臘六世發表咗一份措辭比平時強硬嘅演講,佢響入面譴責搞呢次公投嘅人,話佢哋係「做緊一啲唔合法嘅嘢,係唔可以接受嘅唔服從,同埋破壞緊加泰社區嘅和諧」[13]。佢仲警告話,西班牙東北地方嘅經濟會受好大影響。啲人對佢嘅演講有彈有讚,人民黨讚佢係顯示出對法律嘅忠誠;但聯合我們能嘅領導人就批評國王係阻止緊加泰嘅自治,同埋呢次演講係「唔值得又唔負責」;而西班牙工人社會黨嘅領袖就支持呢次演講,但就批評菲臘六世冇叫西班牙政府同加泰嘅人溝通。後嚟法院裁定加泰隆尼亞自治區政府主席卡萊斯唔可以勝任呢個位,巴塞有示威者嬲到燒咗菲臘嘅肖像[14]

2020年3月,英國報紙「每日電訊報」爆出菲臘六世係前國王環卡洛斯一世旗下一個基金會嘅受益人。呢個基金會嘅錢,係嚟自2008年環卡洛斯一世收咗沙特國王阿卜杜拉嘅1億美金,仲以巴拿馬一間基金會嘅名義存入瑞士一間銀行。王室隨即就話菲臘六世並唔知情,仲宣佈放棄繼承呢筆錢,同埋唔再發王室津貼畀佢[15]。不過跟據西班牙法律,放棄繼承自不過係繼承人自願,當地法律唔容許繼承人放棄,直至遺贈人走咗。

肺炎爆發之後,2020年7月16號佢響王宮主持儀式,悼念死響肺炎嘅人,又多謝醫護人員。佢話,死嘅人並唔孤單,全國市民都會感受到;又讚一班遵守防疫措施嘅人,願意犧牲同埋守紀[16]

政綱同職責[編輯]

2015年,菲臘六世以總司令身份訪問「加利西亞旅」

菲臘六世主要嘅政綱係改善西班牙王室嘅聲望[17][18]

2014年,佢老豆環卡洛斯一世受到貪污等嘅罪名影響,響民望急跌嘅情況下退位[17],交畀當時民望高嘅菲臘[19]。而無耐之前,佢二家姐基斯提娜同二姐夫伊納基又涉嫌貪污而接受緊調查,呢啲事件都嚴重影響王室名聲;《國家報》甚至話,1995年同埋2013年,西班牙人對西班牙王室嘅認可度分別係7.48/10同埋3.68/10,可以見到係跌咗幾多,有人甚至認為係呢單嘢,令菲臘響2015年撤消咗二家姐一家嘅公爵銜頭[20]

菲臘做過一件大事,就係減少屬於西班牙王室成員嘅人數,將兩個家姐、姐夫一家全部撤消王室成員身份,令到依家西班牙王室得返六個人,包括老國王兩公婆,同埋國王一家四口[18]

同年7月,菲臘六世宣佈由Intervención General del Estado派審計師審計王室賬目,而當年就係佢接受審計嘅第一年。王室發言人後嚟話呢個完全係國王自己想做[21]

另外,菲臘上任之後唔畀王室成員響其他公司打工。為咗同啱通過嘅透明度法律相應,佢又發表咗一份查瑞拉宮工人守則,甚至請嚟Abogacía General del Estado幫王室提供永久法律上嘅服務,仲話咁樣可以「確保所有活動都係遵守法律」[21]

2015年2月,由於西班牙經濟唔好,菲臘降低咗自己每年人工百分之二十,變成234,204歐元,比起佢老豆嗰陣嘅人工少咗58,548歐元。王室話,國王係參考咗其他國家元首嘅人工[22]

後嚟,西班牙經濟真係唔係幾好,菲臘響民意嘅壓力之下,宣佈減少王室每年開支。直至2018年,西班牙王室每年總開支係7900萬歐元,係歐洲咁多個王室入面最少[23]

根據西班牙法律,身為國王,佢係國家最高元首同埋三軍統帥,亦以呢個身份響國際上代表西班牙發揮關鍵作用。另外,佢響增進同西班牙文美洲嘅關係上亦有作用[24]

運動[編輯]

身高一米九七嘅菲臘自細就有玩開壁球滑雪[25]

除此之外,佢仲響1989年同1990年攞到西班牙帆船錦標賽Soling級第一;1990年響世界帆船錦標賽攞到第五[26]。呢幾次嘅獎令到佢攞到奧運入場券[26]。1992年3月15號,佢攞到西班牙盃帆船奧運級冠軍,正式可以代表西班牙參加奧運[26]。響同年嘅巴塞羅拿奧運會,菲臘身兼西班牙帆船國家隊成員同埋開幕旗手;而佢老豆環卡洛斯一世、二家姐基斯提娜、阿媽蘇菲亞同舅父康士坦丁二世都分別代表過自己嘅國家做開幕旗手。最後西班牙帆船國家隊以第六名嘅成績完成比賽,菲臘亦因而攞到奧運證書[27]

菲臘自1976年西班牙大元帥盃決賽以嚟就係足球隊馬德里體育會嘅支持者[28],自2003年之後更加做埋馬體會嘅榮譽主席[29]

佢響2018年有份參加西班牙國家橄欖球隊同年世界盃橄欖球賽嘅最後一場主場比賽[30]

屋企[編輯]

菲臘六世一家大細,由左至右係莉安諾親王、菲臘六世、莉迪斯雅王后、蘇菲亞王女

菲臘嘅婚前私生活一直係傳媒嘅焦點。佢同好幾個女人都傳過是非,但得兩個女友係比較受到注意嘅,一個係西班牙貴族伊莎貝拉·沙托烏斯(Isabel Sartorius),另一個係挪威內衣模特兒伊芙·桑努(Eva Sannum)。伊莎貝拉·沙托烏斯係第四代馬里奧侯爵比森特·沙托烏斯(Vicente Sartorius, 4th Marquess of Mariño)個女,兩個人響1989年至1991年期間曾經拍過拖,但王室唔鍾意伊莎貝拉,因為佢阿媽食可卡因食到上癮,所以呢段戀情無疾而終。模特兒伊芙·桑努亦係佢嘅前女朋友之一,同菲臘拍過五年拖,但最後都係響2001年玩完。

當菲臘終於肯認真拍拖嗰陣,冇人估到佢響2003年同莉迪斯雅·柯蒂斯,一位離過婚嘅記者訂婚。2004年5月22號,兩個人響馬德里阿爾穆德納主教座堂結婚,出席呢場婚禮嘅好多都係其他國家嘅王室成員或者係拉丁美洲嘅政治人,另外都有西班牙嘅出名人士,包括威爾斯親王查理斯王子約旦王后紐爾、西班牙第一位太空人佩德羅·杜克等等。

菲臘同莉迪斯亞有兩個女:大女阿斯圖里亞斯女親王莉安諾(2005年10月31號ー),同埋二女蘇菲亞王女(2007年4月29號ー)。兩個女都係響馬德里一間醫院出世。大女莉安諾係依家嘅王位假定繼承人。

榮譽[編輯]

徽章[編輯]

菲臘六世身為阿斯圖里亞斯親王(左)同國王(右)嘅徽章
菲臘六世嘅王家花押字

身為王位繼承人,佢有一個屬於自己嘅徽章。呢個徽章特點有係一個三點青藍嘅帶。左上角係代表卡斯提亞;右上角代表亞拉岡;左下角代表住利昂;右下角代表納華拉;最下面有朵花嘅圖案代表格蘭納達王國;正中間就代表住西班牙波旁王朝(即波旁ー安茹家族)。圍繞住呢幾個圖案嘅個條帶係金羊毛騎士團領章;最上面嘅王冠係王位繼承人先有嘅,特徵係四條弧。

響佢繼位做國王之後,最上面嘅王冠由四條弧變成八條弧,亦冇咗個條三點青藍嘅帶,象徵住佢身份嘅改變。

佢嘅國王徽章同老豆嘅唔同,佢嘅並冇勃艮第十字旗同埋少咗五支箭。

銜頭同稱呼[編輯]

  • 1968年1月30號ー1977年1月22號:西班牙王子菲臘殿下( su alteza real Felipe, infante de España)
  • 1977年1月22號ー2014年6月19號:阿斯圖里亞斯親王、芝羅拿親王、維亞拿親王、白峰公爵、錫維立伯爵菲臘殿下(Su Alteza Real el Príncipe de Asturias, Príncipe de Gerona, Príncipe de Viana, conde de Cervera , señor de Balaguer Felipe)
  • 2014年6月19號ー:西班牙國王陛下(Su Majestad el Rey de España)

雖然佢老豆環卡洛斯響1975年登基做國王,但由於當時阿爺環王子仲持有阿斯圖里亞斯親王呢個等於係儲君嘅頭銜,去到1977年先肯放棄;所以菲臘響1977年1月22號先至畀人冊封成阿斯圖里亞斯親王,正式成為實際上嘅王儲。同時佢亦獲得其他「同王位繼承人對應嘅歷史頭銜」。

菲臘響1990年4月21號訪問亞拉岡加泰隆尼亞華倫西亞個陣,公開用亞拉岡王國嘅王儲頭銜「芝羅拿親王」,係第一位用呢個頭銜嘅波旁王朝成員。

佢響登基之後,稱號係「西班牙嘅菲臘六世」。如果計埋卡斯提亞王國、亞拉岡王國同納華拉王國(跟西班牙歷史),咁佢亦會畀人叫做:亞拉岡嘅菲臘五世、納華拉嘅菲臘七世同卡斯提亞嘅菲臘六世。

評價[編輯]

正面[編輯]

中國駐西班牙大使吳海濤響上任嗰陣,讚菲臘六世同王室一直都大力推動中西關係,響肺炎期間仲互相幫助,兩國嘅關係更加緊密[31]

負面[編輯]

當佢響2015年宣佈一系列對王室嘅改革(撤銷二家姐基斯提娜一家嘅公爵銜頭、減少屬於西班牙王室成員嘅人數)之後,惹嚟大家姐艾蓮娜嘅不滿。艾蓮娜覺得之後以後代表唔到王室做嘢;加上艾蓮娜係三兄弟姐妹入面,同環卡洛斯一世關係最好嗰個,所以佢都唔滿意細佬菲臘對老國王嘅態度[18]

2017年爆發加泰獨立公投,菲臘響期間發表聲明,譴責搞呢次公投嘅人。加泰隆尼亞自治區政府主席卡萊斯批評佢係無視緊加泰多數人嘅意願,話佢作為最高元首但就冇做好調停嘅角色[32]

2020年爆出菲臘六世係前國王環卡洛斯一世旗下一個基金會嘅受益人之後,菲臘火速話自己唔知情同埋放棄繼承呢筆錢。佢宣佈呢個消息嘅時候,正正係西班牙政府宣佈全國進入緊急狀態24個鐘頭之後;但菲臘六世係三日後先至對全國市民發表關於疫情嘅演講。有人批評國王響疫情咁嚴重嘅時候,唔係以國家、搞掂疫情優先,而係走咗去搞王室嘅嘢[18]

[編輯]

  1. 菲臘六世個名既可以係Felipe VI,亦可以係Philip VI。如果跟據西班牙本土方言,佢個名有唔同發音,如下:

參考[編輯]

  1. 英國《衛報》:西班牙新國王菲臘皮六世登基圖輯
  2. 2.0 2.1 "ABC MADRID 31-01-1968 página 43 - Archivo ABC". abc. 2019-08-09. 喺2021-08-18搵到.
  3. 3.0 3.1 "Casa de Su Majestad el Rey de España - Actividades y Agenda - Hitos más importantes de Su Alteza Real el Príncipe de Asturias". web.archive.org. 2014-06-14. 喺2021-08-18搵到.
  4. "ABC MADRID 09-02-1968 página 23 - Archivo ABC". abc. 2019-08-09. 喺2021-08-18搵到.
  5. 5.0 5.1 "Inicio - Castellano - Casa Real". www.casareal.es. 喺2021-08-18搵到.
  6. 6.0 6.1 País, El (1977-01-21). "Don Felipe de Borbón, principe de Asturias". El País (西班牙文). ISSN 1134-6582. 喺2021-08-18搵到.
  7. "ABC SEVILLA (Sevilla) - 22/05/1977, p. 37 - ABC.es Hemeroteca". web.archive.org. 2015-12-11. 喺2021-08-18搵到.
  8. "El Príncipe de Asturias, soldado de honor del regimiento Inmemorial del Rey | Edición impresa | EL PAÍS". web.archive.org. 2015-12-11. 喺2021-08-18搵到.
  9. "El Príncipe Felipe será desde hoy soldado honorario | Edición impresa | EL PAÍS". web.archive.org. 2015-12-11. 喺2021-08-18搵到.
  10. "ABC (Madrid) - 02/11/1977, p. 21 - ABC.es Hemeroteca". web.archive.org. 2015-12-24. 喺2021-08-18搵到.
  11. "BOE.es - BOE-A-1981-11067 Real Decreto 865/1981, de 3 de mayo, concediendo el Collar de la Insigne Orden del Toisón de Oro a S. A. R. Don Felipe de Borbón y Grecia, Príncipe de Asturias". boe.es. 喺2021-08-18搵到.
  12. "SPANISH PRINCE, 18, SWORN IN AS THE HEIR APPARENT - NYTimes.com". web.archive.org. 2016-01-27. 喺2021-08-18搵到.
  13. "西班牙國王:加泰羅尼亞領導人無視法律和民主". RFI - 法國國際廣播電台 (中文). 2017-10-03. 喺2021-08-12搵到.
  14. "不滿打壓加泰 巴塞示威者燒國王肖像". on.cc東網 (中文). 喺2021-07-27搵到.
  15. "潔身自好 西班牙國王費利佩與老父王切割 放棄爭議遺產". RFI - 法國國際廣播電台 (中文). 2020-03-16. 喺2021-07-20搵到.
  16. 頭條日報. "西班牙國王主持儀式 悼念新冠肺炎死者". 頭條日報 Headline Daily (中文). 喺2021-07-22搵到.
  17. 17.0 17.1 "【環球薈報】西班牙國王棄繼承遺產 避父親貪腐醜聞". Now 新聞 (中文). 喺2021-07-19搵到.
  18. 18.0 18.1 18.2 18.3 González, Miguel (2021-03-09). "Spain's King Felipe VI struggles to repair tarnished image of royal family". EL PAÍS (英文). 喺2021-07-28搵到.
  19. "西班牙國王費利佩六世簡約登基 無國宴無巡遊". on.cc東網 (中文). 2014-06-19. 喺2021-08-16搵到.
  20. "Spanish king strips graft-accused sister of duchess title". news.yahoo.com (英文). 喺2021-07-27搵到.
  21. 21.0 21.1 Junquera, Natalia (2014-07-28). "El Rey encarga una auditoría externa y un código de conducta para La Zarzuela". El País (西班牙文). ISSN 1134-6582. 喺2021-07-27搵到.
  22. Junquera, Natalia (2015-02-10). "El Rey se baja un 20% el sueldo y fija uno de 187.356 euros para su padre". El País (西班牙文). ISSN 1134-6582. 喺2021-07-27搵到.
  23. Castro, Irene (2018-04-03). "El presupuesto de la Casa del Rey crece un 0,9% para 2018". ElDiario.es (西班牙文). 喺2021-07-27搵到.
  24. "BOE.es - BOE-A-1978-31229 Constitución Española". www.boe.es. 喺2021-08-16搵到.
  25. "El Rey Felipe se va de juerga con sus amigos sin Letizia | loc | EL MUNDO". web.archive.org. 2017-04-04. 喺2021-07-22搵到.
  26. 26.0 26.1 26.2 "Felipe VI. Rey de España (1968-VVVV) » MCNBiografias.com". web.archive.org. 2015-02-17. 喺2021-07-22搵到.
  27. Cuyàs, Romà (1992). Official Report of the Games of the XXV Olympiad Barcelona 1992, Volume V The Results (PDF). Plaça de la Font Màgica, s/n 08038 Barcelonal: COOB'92 S.A. 原著 (PDF)喺2007-09-27歸檔. 喺2014-06-20搵到. Unknown parameter |dead-url= ignored (help)CS1 maint: location (link)
  28. "Un atlético en la corte del Rey Felipe | espana | EL MUNDO". ELMUNDO (西班牙文). 2014-06-06. 喺2021-07-22搵到.
  29. "Atlético de Madrid Trivia: 25 fun facts about the football club!". Useless Daily: Facts, Trivia, News, Oddities, Jokes and more! (英文). 2016-05-28. 喺2021-07-22搵到.
  30. Limited, Alamy. "Stock Photo - The king Felipe VI, attends the match Spain vs. Germany of the Rugby Europe Championship, held at Madrid, Spain. (Photo: Jose Cuesta/261/Cordon Press). Cordon Press El rey". Alamy (英文). 喺2021-07-22搵到.
  31. "西班牙国王:希望实现西中两国关系更大发展-新华网". www.xinhuanet.com. 喺2021-08-12搵到.
  32. Storm.mg (2017-10-05). "加泰隆尼亞主席批國王無視人民心聲:最快下周一宣布獨立!-風傳媒". www.storm.mg (中文). 喺2021-08-12搵到.