飛 (架生)
(由門票跳轉過嚟)
飛，書面語叫票、入場券，係一種入場証明，通常都要畀錢，例如用嚟：入閘搭車、睇戲、睇演唱會或進入其他收費活動場地等。有啲免費活動需要限制入場人數，都需要先向主辦單位攞飛。
飛通常係紙造，有兩部分，入場嗰陣時工作人員會搣走短嗰部份，剩低嘅部份叫飛尾。亦有啲係膠造，飛嘅背面有磁帶，用喺自動入閘機。
飛出自唐朝「飛錢」。飛錢係類似而家嘅支票。唐朝嗰時，商賈嫌帶真金白銀出入好重，易俾人打劫，就稟報朝廷，想以飛錢代真金白銀。《新唐書食貨四》「時商賈至京師，委錢諸道進奏院及諸軍、諸使富家，以輕裝趨四方，合券乃取之，號飛錢。」所謂飛錢，係要揸住飛尾，去進奏院，對返飛頭，先兌得返做真金白銀。呢種飛尾對飛頭嘅做法叫「合券」。由於唔使自己運錢，揸飛仔就可以喺第二處攞錢，啲錢好似曉飛咁，唐朝嘅支票就叫做飛錢喇。
名
[編輯]香港之前係英國殖民地，香港人鍾意將英語粵語混合使用，就將英文諧音變成粵語口語，講講吓就變成粵語嘅一種。而買票講成「買飛」，「飛」字應該係英文fare（費用）演變而成，由英文發音相近生成嘅粵語詞語。
另一個講法係，舊時廣東一帶，粵劇盛行，每逢有戲班公演，都爭住買票，情況混亂。有啲壞人霸住售票處，唔俾市民接近，如果想買票嘅話，就要畀錢班壞人嘅同伴，再由同伴大聲叫壞人將嗰啲票拋過嚟，由於啲票飛嚟飛去，大家就將票子改稱為「飛子」，再簡稱為「飛」[1]。
飛仔
[編輯]- 其他意思，睇飛仔。
飛仔，排隊用，有冧巴嘅紙仔，叫到冧巴揸飛嘅人得到相關嘅服務，例如食肆等位。
飛嘅種類
[編輯]- 車飛
- 火車飛
- 電車飛
- 地鐵飛
- 船飛
- 戲飛
- 演唱會飛
- 六合彩飛
- 機票：呢個係特別例子，唔叫做「機飛」，因為會產生誤會，所以就用返書面語嘅「票」字。