陳健康事件

陳健康事件係源自1998年10月19號喺香港新界上水天平邨發生嘅一宗倫常命案。事件主角陳健康嘅老婆頂唔順老公上深圳包二奶，將佢哋兩個仔由天平邨天明樓14樓住所掟落街，之後自己跳樓，三仔乸都死咗。

事件引嚟傳媒爭相報導，追訪陳健康嘅下落同埋佢包二奶嘅細節；其中《蘋果日報》記者畀咗5000港元陳健康去召妓，再影獨家相，令公眾嘩然。案件成為探討香港傳媒專業操守嘅案例同教材。