2015年尼泊爾地震
2015年尼泊爾地震（又叫：喜馬拉雅山地震[1][2]）發生喺2015年4月25號（星期六）11時56分25秒（尼泊爾標準時間，UTC+5:45），震央位於尼泊爾甘達基專區拉姆瓊縣東南偏東廿九千米，矩震級係7.8Mw，面波震級係8.1Ms，最大烈度係IX級（強烈）。呢場地震係繼1934年比哈爾邦地震之後再發生嘅最強烈地震。至少四千人喺呢次地震入面死咗，災區包括尼泊爾、印度北部、巴基斯坦、孟加拉同中國西藏近尼泊爾嘅地方。被聯合國教科文組織評為世界遺產嘅加德滿都谷地、加德滿都王宮廣場同埋有好多有幾個世紀歷史嘅建築都係呢次地震入面震爛晒。
災區
[編輯]
西藏日喀有大量冧咗嘅屋，都反映出尼泊爾7.9級嘅強烈地震威力，加上之後發生過多次餘震，都令到大量建築物損毀，唔少人都疏散去室外[3]。
而消防官兵就搭建臨時帳蓬畀民眾住著先，但係峽谷入面嘅重災區之一聶拉木縣，去嗰度嘅路好多都被冧落嚟嘅石頭塞住咗，要用到爆破嘅方式先可以打通返條路，加上落雪，都阻延救援隊伍入災區嘅時間[3]。
第一批救援嘅嘢，包括糧食、發電機之類都會喺4月26號運到災區，而拉薩亦都調派人手去吉隆、樟木、聶拉木等災區地方，進行地毯式搜救[3]。
同尼泊爾南部有連接嘅印度北部廣泛地區，包括首都新德里亦都受災嚴重，有成十幾人死咗[3]。
地震引發珠穆朗瑪峰雪崩，令到喺尼泊爾一邊嘅登山大本營有好多帳篷被雪掩埋，部分登山人士重未揾返[4]。有英國登山隊成員話，呢度啱啱發生餘震：「就同我哋喺星期六遇到嘅地震係一樣，搖得特別勁。」
救援
[編輯]中國國際救援隊幾十人帶埋醫療用品之類嘅救援物資，去尼泊爾參加救災，佢哋大部分人都曾加過汶川、海地等地震救援工作[3]。中國國際救援隊隊員王念法話：「最大嘅難度就係磚頭震爛咗之後好易變成粉沙造成活埋，掩埋之後佢埋得好入，佢又唔係鋼筋石屎咁樣有罅可以畀人有生存空間。」國務院總理李克強第一時間打電話慰問尼泊爾總理柯伊拉臘，又話畀佢聽中國會為尼泊爾提供緊急援助。而國家主席習近平就打電話畀總統亞達夫表達深切哀悼，又話中方願意向尼泊爾提供援助[3]。
印度空軍要派飛機去到尼泊爾陸續撤走超過五百個國民，又計劃派運輸機，諗住運流動醫院要用到嘅嘢去尼泊爾參加救災[3]。
美國初步撥一百萬美元出嚟救災，又派出災害小組幫手搜救[3]。
聯合國亦準備開始救援，無國界醫生四支救援隊亦都出發去尼泊爾，同埋運送醫療用品去當地[3]。
參考資料
[編輯]- ↑ （英文）Cindy Tran; Liam Quinn (25 April 2015). "Desperate families of DOZENS of Australians unaccounted in the deadly Himalayan earthquake disaster take to social media with pleas for help finding their loved ones". Daily Mail. 喺26 April 2015搵到.
- ↑ （英文）Chidanand Rajghatta (26 April 2015). "s this the 'Big Himalayan Quake' we feared?". The Times of India. 喺26 April 2015搵到.
- ↑ 3.00 3.01 3.02 3.03 3.04 3.05 3.06 3.07 3.08 3.09 （繁體中文）多國搜救隊陸續抵達尼泊爾救援 互聯網檔案館嘅歸檔，歸檔日期2015年7月13號，.
- ↑ （繁體中文）尼國地震逾2400人亡 部分村落或被掩埋 互聯網檔案館嘅歸檔，歸檔日期2015年7月13號，.