Morning娘。

Morning娘。（モーニング娘。），亦有人稱為早安少女組。，係1997年出道的日本女子偶像組合，係演藝經紀公司Up-Front Agency嘅女子偶像牌子Hello! Project旗下首要組合。佢嘅單曲及專輯總銷量超過1600萬張，銷售額超過270億日元。

組合特點係成員多數係後生女仔以及不斷加減成員以維持新鮮感，平均每年就會加減成員一次，人數最多曾經去到16人，係Hello! Project內成員加減最頻密嘅組合。最佳作品係1999年銷量超過164萬張嘅「LOVE MACHINE」，當時嘅組合特色係成員年齡差距極大，相差可以超過12年，因此歌迷年差亦好闊。新成員主要透過公開報名形式（選拔會）召募，現役所有成員都係六期或以後加入。