反對普京嘅聲音

廣義反對普京嘅聲音，大約可以分為喺議會有一定規模嘅反對黨，同埋其他較鬆散，喺議會無議席或者得好微弱聲音嘅非系統性反對組織（non-systemic opposition）。不過，有評論就認為，喺議會有一定規模嘅反對黨，其實多少都對普京同佢領導嘅政府有一定支持。而主要非系統性反對組織，包括俄羅斯統一民主黨「亞博盧」（Yabloko），人民自由黨（People's Freedom Party，縮寫 PARNAS）同埋未有正式註冊嘅俄羅斯未來（Russia of the Future）。反對普京嘅聲音，喺政治觀點上可以相差甚遠，但係喺反對普京同埋針對俄羅斯貪腐問題上立場就相對一致。不過，由於佢哋缺乏團結，亦弱化咗佢哋嘅地位。另外，佢哋嘅領導人物，往往會成為暴力，甚至係暗殺嘅對象。佢哋指控呢啲係同普京政府有關。佢哋亦指控，普京政府經常用法律或其他各種手段，去阻止佢哋贏出選舉。