天然氣

天然氣係燃料嘅一種，係動、植物通過生物、化學作用同地質變化作用，喺唔同地質條件之下生成、轉移，喺一定嘅壓力下儲集，埋藏喺深度唔同嘅地層中嘅優質可燃氣體。主要成分包括：甲烷（CH4），另外重含有氮、二氧化碳、硫化氫同微量嘅氦、氖、氬等氣體，喺唔同產地同埋唔同生產方式嘅天然氣，成分同物化性質都會有啲唔同。

種類

天然氣一般分為四種：從氣田開採出嚟嘅氣田氣，又稱為純天然氣；伴隨石油一齊開採出嚟嘅石油氣，又稱為石油伴生氣；含石油輕質餾分嘅凝析氣田氣；從煤礦井下煤層中抽出嘅礦井氣。煤炭、石油、天然氣三兄弟都係古代植物殘骸演化而成嘅化石碳能源，但係特點都好唔同，煤炭係固體，石油係液體，以甲烷為主嘅天然氣係氣體。而且相對煤、石油嚟講，天然氣係一種更稀少、分佈更集中嘅資源。

狀態

根據物理狀態天然氣可以分為：

• 天然氣（Natural Gas，NG）
• 液化天然氣（Liquefied Natural Gas，LNG）
• 壓縮天然氣（Compressed Natural Gas，CNG）

物化性質

天然氣係無色、無味、無毒、無腐蝕性，易燃、易爆嘅氣體，比空氣輕，主要成分係甲烷（CH4），燃燒溫度大概係650℃，燃燒生成物主要係二氧化碳同水。喺常壓或者略高過常壓下低溫（-162℃）液化咗嘅天然氣，體積大概係佢氣態體積嘅六百分之一。