政務職系
政務職系（Administrative Officer，簡稱AO）又叫政務主任、政務官，係香港公務員職系一種，屬於專業嘅管理通才，喺香港政府入面擔當重要角色[1][2][3]。AO會定期被派到決策局同部門擔任唔同職位，負責制定政府政策，被視為係晉身首長級公務員嘅踏腳石。絕大部分政務主任都可以晉升首長級政務官，而大部分現任高層首長級公務員（常任秘書長、部門首長等）都係嚟自政務職系。
入職條件
[編輯]政務主任入職條件好高，申請人首先要：
- 持有香港本地大學頒授嘅一級或二級榮譽學士學位或同等學歷；或持有香港任何一所大學頒授嘅學士以上嘅學位，或具備同等學歷，而其整體嘅學歷資格要同一級或二級榮譽學士學位相若；
- 喺政府綜合招聘考試（CRE）入面，英文運用、中文運用都要攞到第二級成績，並且喺能力傾向測試卷入面攞到合格成績。
仲要喺聯合招聘考試（JRE）入面，中文同英文寫作（個案處理）試卷入面攞到合格成績，兼且通過三個回合嘅面試。最後，申請人喺獲聘嗰陣須要係香港永久居民兼且喺香港居住滿七年。
編制同薪酬
[編輯]| 薪級 | 職級 | 職位 |
|---|---|---|
| 首長級薪級第8點(D8) | 首長級甲一級政務官 | 決策局常任秘書長 |
| 首長級薪級第6點(D6) | 首長級甲級政務官 | 第 II 組部門首長，如：路政署署長 |
| 首長級薪級第4點(D4) | 首長級乙一級政務官 | 決策局(高級)副秘書長、第 I 組部門副署長／副處長 |
| 首長級薪級第3點(D3) | 首長級乙級政務官 | 決策局副秘書長、第 II、III 組部門副署長／副處長、第 I 組部門高級助理署長／高級助理處長 |
| 首長級薪級第2點(D2) | 首長級丙級政務官 | 決策局首席助理秘書長、各區民政專員、部門助理署長／助理處長 |
| 總薪級表第45－49點 | 高級政務主任 | 決策局高級助理秘書長、各區助理民政專員、部門高級政務主任 |
| 總薪級表第27－44點 | 政務主任 | 決策局助理秘書長、各區助理民政專員、部門政務主任 |
成立歷史
[編輯]1968年，各區民政主任辦事處成立，隸屬華民政務司署，市區劃分為10個區域，4個喺港島，6個喺九龍，各區域由1個政務主任主管，帶領多個聯絡主任推行各項工作[4]:5。民政主任向公眾說明政府政策同實際行政，向當局報告社會人士嘅反應，同街坊以及其他地區組織保持密切聯絡，喺佢主管嘅區域入面協調政府嘅活動，安排暑期青年活動，向公眾提供諮詢同投訴嘅服務[4]:5。
攷
[編輯]- ↑ 李彭廣博士 (2015年12月)。〈1997年前嘅香港管治系統：特選政策／事件嘅檔案研究〉 (PDF)。原先內容歸檔 (PDF)喺2021-06-15。喺2021-06-15搵到。
- ↑ 〈李彭廣解讀英國治港謎團〉。亞洲週刊。2012年6月。原先內容歸檔喺2021-06-15。喺2021-06-15搵到。
- ↑ 嚴飛 (2013)。〈殖民管治香港嘅要義 — 評《管治香港》〉 (PDF)。原先內容歸檔 (PDF)喺2018-12-23。喺2021-06-15搵到。
- ↑ 4.0 4.1 《《香港一九七四——一九七三年嘅回顧》》。香港：政府印務局印行。1974。
出面網頁
[編輯]- 香港公務員政務職系Wayback Machine嘅版面存檔備份
- 政務主任/行政主任聯合招聘考試Wayback Machine嘅版面存檔備份
- 香港大學政府職位空缺查詢系統