明信片

明信片，舊時廣東話叫做甫士咭，係一種信，寫嘅嘢無封埋，乜人都睇到，所以叫明信，而佢係咭一張，所以叫片。甫士咭來自係英文Postcard音譯，意思郵咭。明信片係一張咭，一面有畫或者相，另一面就留返來寫字。明信片嘅畫或者相，通常都係講當地嘅風物，好似風景人物咁。所以，遊客去到某地，會買明信片寄畀親友，甚至寄返屋企留念。明信片好有收藏價值，皆因佢好多都留低一地當年風貌。