林肯甘迺迪巧合嘅都市傳說

林肯

甘迺迪

林肯同甘迺迪嘅巧合係關於兩位美國總統遇刺案嘅相同或類似地方嘅都市傳說。1963年甘迺迪遇刺之後就有呢個都市傳說。呢個都市傳說第一次出現喺《G.O.P.國會委員會通訊》。馬田加德納喺《科學人》刊登咗一篇揭穿呢一項都市傳說嘅文。雖然已經過咗五十幾年，但係呢項都市傳說仍然廣泛流傳。

例子

以下嘅短版本例子係用來舉證嘅，不過列表入面部分共通點已經被證實錯誤，部分更加係子虛烏有。

Y等於係啱嘅，N等於係錯嘅。

• Y林肯同甘迺迪嘅姓氏各有7個字母。
• Y兩個人全名都有5個音節。
• Y兩位總統都係喺47年當選美國眾議院議員。
• Y兩位喺56年都獲選黨內副總統人選嘅第二名。
• Y兩位總統都係喺60年當選總統。
• Y兩位總統都關注有關非裔美國人嘅問題，並且同樣喺63年表達自己嘅觀點。林肯喺1862年簽署《解放奴隸宣言》，後來喺1863年成為法律。1963年，甘迺迪就有關黑人民權喺國會發表報告書，同年發生華盛頓大遊行。
• Y兩位總統一樣係頭部中槍。
• Y兩位總統中槍嗰日都係星期五。
• Y兩位總統中槍嗰陣，佢哋嘅老婆都在場。
• Y兩位總統​​都伴隨著另一對夫婦。
• Y陪伴兩位總統​​另一對夫婦入面嘅男方都被行刺者所傷。
• Y林肯喺福特劇院中槍。甘迺迪就係喺由福特汽車整嘅林肯汽車入面中槍。
• Y行刺者約翰威爾克斯布思同李哈維奧斯華都係喺審訊之前被殺。
• Y兩個行刺者嘅姓名各有3個字，總共15個字母。
• Y兩位各自嘅副總統同埋繼任人都係生於08年名叫Johnson嘅民主黨人。林肯被殺之後嘅繼任總統叫安祖莊臣，1808年出世；甘迺迪被殺之後嘅繼任總統叫林登約翰遜，1908年出世。
• Y兩位Johnson個名都有6個字母。
• N兩位總統​​都係連任之後先至被暗殺。
• N約翰威爾克斯布思從劇院走咗入倉庫，李哈維奧斯華從倉庫走咗入劇院。
• N林肯有位叫甘迺迪嘅秘書叫佢唔好去劇院。甘迺迪嘅秘書伊芙琳·林肯（遲過林肯100年出世，佢老公哈羅德嘅外號係「Abe」，林肯的暱稱都係「Abe」）警告佢唔好去達拉斯。

以上部分共通點係啱嘅，例如兩位當選美國總統嘅年份，不過呢點並唔特別，因為美國總統選舉都係4年一次，而佢哋開展政治生涯的時間相差100年。其餘部分扭曲咗事實，有啲被指為巧合嘅地方就全無真憑實據，例如並無任何證據顯示林肯有位名為甘迺迪嘅秘書，曾經擔任佢嘅秘書有約翰海伊同埋約翰·佐治·尼古拉。

批評

有啲都市民俗學家推測，列表嘅出現係源於啲人通過揾其中嘅關連，來表達兩單美國總統遇刺案嘅意義。正如馬田加德納等人所指，儘管啲人可以好輕易從呢兩單遇刺案入面找到睇落有意義嘅共通點，但經過嚴格審視之後，部分巧合嘅地方往往站不著腳。

睇埋

• 林肯遇刺案
• 甘迺迪遇刺案