秋葉原

秋葉原（日語：秋葉原；假名：あきはばら；平文式羅馬字：Akihabara）係日本一個以秋葉原站為中心，以大量電子電器賣場、商城同資訊產業企業聚集而聞名嘅電子商圈（電気街）。地理上大致涵蓋東京都千代田區外神田、神田佐久間町、神田花岡町同台東區。秋葉原地區內嘅商店大都係以銷售家電、電腦同相關周邊衍生產品為主，同大阪市的日本橋、名古屋市嘅大須一齊被併稱為「日本三大電氣街」。由於地名較長，當地人經常將佢簡稱為秋葉或アキバ（Akiba）。

簡介

秋葉原喺東京都千代田區，處於環繞東京市中心嘅高速電車山手綫上，山手綫係JR東日本一條環繞成個東京市區嘅電車幹線。作為世界上屈指可數嘅電器街，而家嘅秋葉原正發生緊日新月異嘅變化。除咗電器商品專賣店之外，商務、飲食等服務功能亦日漸具備齊全，正喺度發展成為一個具有綜合性色彩嘅繁華區域。

起源

喺江戶時代，秋葉原電器街一帶曾經係下級武士嘅居住地。明治之後，日本開始進入電氣化時代，除咗開始使用電燈，1926年NHK嘅電台廣播亦都正式開始。作為瞭解消息以及娛樂活動嘅手段，收音機得以迅速普及。賣電線、配電器、總掣、收音機器件嘅批發商亦隨之成長起嚟。但係太平洋戰爭爆發後，除咗軍事用途以外電機材料變得好難入手，連電燈膽都採取配給制，所以呢類商業買賣陷入咗困境之中。1945年東京大空襲後，成個東京幾乎俾盟軍全面摧毀，秋葉原一帶亦幾乎變成焦土。

御宅一條街

遊戲咖啡廳、漫畫茶館

80年代至90年代間，喺電腦嘅普及同埋技術革新浪潮嘅帶動下，電子遊戲界亦呈現出一片盛況。好多遊戲發燒友開始流連於秋葉原。模仿遊戲中嘅場景設定同出場人物裝扮嘅茶館亦都喺嗰陣時出現咗。跟住以服務生Cosplay形式營業嘅咖啡廳亦陸續登場。結合漫畫茶館同遊戲咖啡廳為一體嘅店鋪亦都幾有人氣。秋葉原而家大概有10間以上咁樣嘅店舖，由於日本勞動基準法嘅原因店鋪一般嚴格按照朝九制度，一般都係八九點鐘開檔，收檔就晏啲。

面向動漫發燒友嘅專門店

經常去秋葉原嘅人當中有好多都係動漫發燒友。以好難入手嘅人氣漫畫家嘅同人雜誌為銷售對象嘅店鋪喺秋葉原日漸增加。出售運氣占卜牌、動漫主人公周邊、玩具、Figure同埋模型嘅鋪頭亦開到成行成市。