管風琴

管風琴

管風琴係一種大型樂器，用送風設施送風吹響音管，再配合手拉嘅掣同雙手同雙腳彈嘅鍵盤去控制。管風琴被人認為係鍵盤樂器，但係其實主要係管樂器。舊式嘅管風琴要人手泵氣，新式嘅大型管風琴可以有機房用大型機器泵。

管風琴嘅高低音主要由管嘅長度決定，以中央 C（電子音樂叫 C₄）做例，八呎長嘅管對應正常嘅音高，用四呎長嘅管就會令彈出嘅音高八度，如此類推，用邊支管由拉掣控制，通常用多過一支管，一般人心目中嘅管風琴聲其實已經係會好多支管一齊用。管風琴嘅管主要係用鉛同錫嘅合金造，亦有啲管係木造。

管風琴可以有多過一個鍵盤，每個鍵盤獨立控掣唔同嘅一柞管，腳掣亦都係一個獨立嘅鍵盤，喺樂譜可以有一行係腳彈嘅部份，甚至可以有成段音樂淨係用腳彈。

同鋼琴唔同，管風琴嘅鍵盤並冇標準，啲拉掣亦都冇標準位，風琴師彈一個唔係彈慣嘅琴，往往要用一啲時間去熟習個琴。