霍去病

霍去病（前140年—前117年）係漢國將軍，當時河東平陽人。佢因為協助漢武帝劉徹打贏匈奴而聞名天下。佢係皇親國戚，姨媽衞子夫係劉徹嘅皇后之一。而舅父衞青，係漢國大將軍，霍去病自細跟佢從軍。霍去病封咗做冠軍景桓侯。

屋企

霍去病係霍仲孺同衞少兒嘅仔。霍仲孺係平陽縣衙役，而衞少兒係平陽公主奴婢。佢哋私通，生咗霍去病。霍去病姨媽衞子夫，畀劉皇帝徹睇中入宮。有次衞青畀館陶公主捉咗，大難不死，劉徹一怒下大封衞氏家族，而子夫就封咗做夫人。

仲孺之後同少兒分手，返鄉下娶老婆，另外生咗霍光。少兒之後識咗陳掌，陳掌係漢國初年名臣陳平之後。皇帝劉徹知道件事，就安排少兒，帶埋去病，嫁畀陳掌，兼升做詹事。

後尾，子夫生大仔劉據，立為皇后。而舅父衞青，係朝中大將軍，戰蹟彪炳。霍去病變咗皇親國戚，及後扶搖直上。自此帶挈霍家，入主漢國朝政。而同父異母細佬霍光（博陸宣成侯霍子孟），就係佢帶入朝，成爲昭宣中興一代名臣。

漢冠軍景桓侯霍去病，武帝衞皇后姊子也。其父霍仲孺先與少皃通，生去病。及后日尊，少皃更為詹事陳掌妻。

霍去病虛齡十八，就做咗侍中。因爲佢騎射都叻，就跟舅父大將軍衞青從軍。

去病以皇后姊子，年十八為侍中。善騎射，再從大將軍衞青。大將軍受詔，予壯士，為剽姚校尉，與輕勇騎八百直棄大軍數百里赴利，斬首捕虜二千二十八級，得相國、當戶，斬單于大父行籍若侯產，捕季父羅姑比，封去病為冠軍侯，食二千五百戶。

相傳「霍去病」出世冇耐，衛少兒抱住佢去皇宮搵妹妹衛子夫玩，感冒緊嘅武帝突然聽到一聲嬰兒嘅大喊聲，即時所有冷汗都嚇到出曬嚟，感冒亦都就咁好返。而呢個令到武帝出冷汗嘅嬰兒，就得到「去病」呢個名。

呢篇同中國人相關係楔位文。歡迎幫維基百科擴寫佢。