中華人民共和國對外黑客攻擊

有唔少國家嘅政府，都有指控中國政府或用戶，話佢哋對外國嘅公司、大學和政府機構，盜取知識產權和機密商業信息，包括傳染病研究等等，以圖令中國繞過漫長同耗費資源巨大嘅研發過程。有啲政府甚至會對一啲中國公民作出拘捕行動。綜合唔同嘅報導，受害國家包括美國、奧地利、柬埔寨、加拿大、德國、印尼、馬來西亞、愛爾蘭、挪威、沙特、印度、南非、瑞士同英國，而行業就包括航天、國防、教育、政府、衛生、生物製藥同海事。而APT41，就係其中一個專門幫中國政府從事間諜行動嘅駭客集團。

除咗應對外國之外，呢啲手段亦用嚟對付異見人士。

對外攻擊發展

有部分觀點認為，來自中國嘅網絡攻擊早喺2009年就已經公開化。2009年10月，美國中國經濟和安全事務委員會就曾經向國會提交《中國實施網絡戰和計算機網絡應用能力》報告，警告美國要警惕中國嘅網絡間諜活動。

雖然喺2015年，美中兩國領導人簽訂咗網絡安全協議，情況一度有所改善，但同時仍然有公司表示，繼續被中國黑客襲擊。亦有美國嘅網絡安全公司分析話，中國嘅網絡間諜活動並無收斂。另外，中國喺中美貿易戰入面亦曾經使用呢啲手段，美國公司同政府部門網站進行間諜活動。

例子

喺武漢肺炎疫情期間，有由中國政府支持嘅黑客團體，曾經向歐洲醫院同印度疫苗製造商嘅系統進行攻擊，意圖獲取佢哋嘅數據。

對付記者、維權同異見人士

• 喺2015年香港區議會選舉，有至少有20名民主黨成員嘅電郵喺區議會選舉前遭來自中國IP地址嘅黑客攻擊。美國網路保安公司FireEye話，呢啲攻擊嘅手段主要係用嚟攻擊中共政府嘅監視對象，畀當局可提早知道泛民主派計畫示威等資訊。
• 喺2016年-2021年期間，香港民主運動人士黃之鋒、陳志全、梁頌恆、涂謹申、劉小麗同陳健民等，都多次引述Google發畀佢哋嘅警告表示，自己嘅Gmail戶口受到某啲政府支援嘅黑客攻擊，嘗試竊取密碼。而佢哋都不約而同暗示，覺得呢啲攻擊來自中國。
• 2021年3月，一啲中國黑客被Facebook揭發入侵境內外維吾爾人士，包括記者、維權同埋異見人士等嘅電腦同埋智能電話，佢哋透過植入惡意程式，以對目標對象進行監視。

外國政府同公司嘅行動

美國對呢啲行為採取強硬態度：

• 喺2021年7月，美國就起訴咗4名中共海南省國安廳嘅特工，指控佢哋從2011到2018年針對美國同其他國家嘅幾十個公司、大學同政府機構，盜取知識產權同機密商業信息，包括傳染病研究等等。
• 另外，喺2021年3月，中國黑客入侵微軟Exchange嘅伺服器之後，美國白宮嘅國家安全委員會亦即時下令微軟採取行動作出補救。

Facebook喺2021年揭發中國黑客針對維吾爾族人嘅黑客攻擊之後，立即封鎖有關黑客嘅帳戶。

中國回應

中國外交部同一啲被指控嘅政府組織或大學多數採取否認嘅態度。外交部發言人華春瑩曾經喺2018年7月嘅時候話中國反對任何網絡攻擊。