功課

功課即係喺學校嘅課堂裏面，老師派畀學生攞返屋企做嘅練習，功課可以話係學生要喺屋企要做嘅工作。

功課嘅性質視乎學生所學嘅學科而定，有啲係屬於文字性嘅，又會有要計數嘅功課，重會有關於手工勞作嘅，或者實驗性嘅，不過總之凡親老師指派畀學生做嘅功課，都係會有個期限要學生完成，並且要交返去學校等老師畀分。

網上學習

有啲老師出功課題目擺上網，可能要學生喺屋企或者學校上網做，即時選答或者指定時日喺網上交功課。

亦有啲老師要學生上網做練習，呢啲都算係功課嘅一種。

雖然係網上，但同普通功課一樣，欠交都要扣分，亦可能會俾人罰。

堂課

堂課係功課嘅一種，學生要嚮班房落堂前做晒，唔係就當欠交功課，成績扣分。堂課係開卷式，唔係測驗。

有時老師又會因為學生唔夠時間做堂課，而畀佢哋返屋企做，咁就會變咗做功課。

欠交功課

欠交功課係嚮限期前交唔出份功課，之後又唔補交。後者補交又叫做「遲交」功課；而欠交功課係從來都冇交過份功課，簡稱為「欠交」。遲交功課可能會扣分，又可能會俾學校拒收，按規定同欠交一樣冇分。欠交功課可能係對學嘢冇誠意，唔係都會試做下份功課，試交下功課，等老師知道學生認知程度，唔係想玩對抗。

其他意思

喺香港，亦有人會用「做功課」嚟形容鑽研同埋資料搜集嘅行為，例如：

• 啲人賭馬或者賭波，會喺賽前攞一份賽馬或者足球嘅資料（俗稱「馬經」及「波經」）嚟做功課，從中研究出馬仔或者球隊嘅往績、狀態形勢，然後釐定出最大機會贏錢嘅投注策略。
• 上班一族要完成手頭上嘅工作，可能要經過好多唔同嘅途徑嚟搜集資料，而四圍揾資料呢個舉動亦都俾人稱之為做功課。