南粵先賢館

南粵先賢館

 南粵先賢館（粵拼：naam4 jyut6 sin1 jin4 gun2） 係中國廣東廣州嘅博物館，2013年1月15號奠基，2017年5月9號完工，2017年5月17號開館，2018年2月8號全面開放，位置喺越秀區西邊，東靠五仙觀；南靠惠福西路；西靠甜水巷；北靠洪德一巷。

博物館入面主要做先秦到民國間，56位（包括趙佗、林則徐、孫文等名人在內）對國家、民族有貢獻嘅南粵名人，重有對嶺南文化有重大影響嘅歷史文化等等一系列展覽。

史

1985年，嗰時廣東省委副秘書長張漢青發咗封信畀廣東省委話要起呢間博物館出嚟，但因為嗰時冇乜點注重文化而一直冇搞。由於2000年代，越嚟越多人開始注重嶺南文化，廣東省委喺2004年搞五仙觀二期工程時開始關注咗呢個項目，重落實喺五仙觀西邊隔籬搞間博物館出嚟。2007年，嗰時廣東省委常委朱小丹話博物館面積太細，後嚟經過一番討論，最後決定喺五仙觀兩邊搞間南粵先賢館出嚟。

從2010年1月開始，施工方用咗3年時間搞掂嗮拆遷同報批手續，最後喺2013年1月15號奠基，同年7月正式開工，直到2015年12月16號正式搞掂建築架構工程。原先計劃喺2016年5月18號開館，但因為博物館方重喺度徵集緊文物而推遲開放，直到2017年5月17號先至試營運兩個禮拜，本嚟諗住喺同年9月1號正式全面開放，但因裝修未搞掂而一度推遲開放，直到2018年2月8號先至正式全面開放。

飛同開放時間

飛

場館雖然係免費開放，但係入場時必須要噉做：

• 個人：必須要喺領飛亭攞有效嘅身份證或學生證或老人證排隊攞免費參觀飛，限一人一證一飛入場。
• 身高＜1.4m嘅細路免票。
• 團體（＞10人）：必須要提早三日預約，經確定成功之後再按約定時間入去參觀。

開放時間

• 每個禮拜二到日09:00～17:00
• 逢禮拜一閉館，但除特殊情況或法定公眾假期之外。