土瓜灣故事館
| 土瓜灣故事館 House of To Kwa Wan Stories | |
|---|---|
 | |
| 簡稱 | 土家 (Tohome) 土家故事館 |
| 創立時間 | 2014年1月 |
| 性質 | 非牟利組織 |
| 目的 | 俾土瓜灣街坊自由當作「家」嘅社區空間 |
| 總部 |  香港九龍土瓜灣道94號美華工業中心B座11樓01室（2021年起） 香港九龍土瓜灣鴻福街16號（2014年-2021年） |
| 區域 | 土瓜灣 |
| 主要機構 | 維修香港 社區文化關注 |
| 網站 | www.tohorizonhome.wixsite.com |
土瓜灣故事館 （粵拼：tou2 gwaa1 waan1*4 gu3 si6 gun2；英文：House of To Kwa Wan Stories），減筆叫土家，所以又叫土家故事館。係香港土瓜灣一個由維修香港以及社區文化關注組成嘅一個非牟利組織暨私人街坊聚腳地，舉辦唔同關於土瓜灣嘅活動，例如導賞團、放映會、編寫刊物等[1]。2014年開始喺土瓜灣鴻福街16號營運，但因土瓜灣重建，而家搬咗去美華工業中心。
土瓜灣重建[編輯]
由於市區重建計劃，鴻福街16號業權而家已經俾政府市區重建局收番重建，2016年，市區重建局宣布重建土瓜灣六個重建項目，鴻福街亦有份，所有人同舖頭都要搬走，而當地居民同土家曾經成立「重建店舖租客關注組」，一齊向市建局爭取緊喺重建計劃入面，點樣安排畀受市區重建影響嘅人同舖頭搬走。2019年，市建局用《土地收回條例》，開始正式收樓，土家同部份居民同舖頭當時留到最後一刻，卒之俾政府告霸佔官地，土家不滿市建局幾年都冇回應佢哋安置居民同舖頭訴求，重建後起私樓、商場，冇公屋、居屋，揀咗抗辯，最尾敗訴，要喺2021年8月16日之前搬走。[2]
區域法院裁定土家要搬走之後，多名成員喺庭外以「還我土地，還我自由，還我生活，別為圖利作借口」等口號抗議，指市建局嘅重建係一個不公義嘅城市規劃同發展，用睇落文明嘅推土機粗暴搶地。《文匯報》嘅立場親中共，引伸對非建制派嘅態度亦唔友善，形容土瓜灣故事館係「攬炒派」唔肯搬走，阻住香港發展。[3]
九龍城區議員楊永杰話，重建計劃已經4年時間，認為土家講「迫遷」極唔公道，只係想抹黑市建局。[3]
市建局非執董、工聯會立法會議員郭偉强就話，土家敗訴不特止仲惡人先告狀，抹黑市建局工作。[3]
參考[編輯]
- ↑ 〈【土瓜灣重建】土家倒數一個月 鴻福街十六號迎來終結 但仍深信社區未完〉. 《明報周刊》 (香港中文). 喺2021-07-18搵到.
- ↑ 〈【土瓜灣重建】扎根鴻福街7載 土家迫遷倒數：社區未完 繼續化零為整〉. 《《[[眾新聞]]》》. 2021-08-06. 原著喺2022-04-03歸檔. 喺2022-04-04搵到.
- ↑ 3.0 3.1 3.2 〈【攬炒派劣行錄】「土家」霸官地 屈市建「迫遷」〉. 《《[[文匯報 (香港)|文匯報]]》》. 2021-04-19. 原著喺2022-04-08歸檔. 喺2022-04-04搵到.
連出去[編輯]
|