堤岸 (越南)

出自維基百科,自由嘅百科全書
跳去: 定向搵嘢

堤岸越南文Chợ Lớn),係越南胡志明市嘅一個地區,位於西貢河西岸,地界範圍涵蓋胡志明市第五郡嘅西部同第六郡部分嘅區域。呢個地區因為係越南規模最大嘅華人聚居地同著名觀光景點而聞名[1]。胡志明市嘅幾十萬華人之中,大多都集中住喺堤岸[2],有「小香港」嘅別稱,每日出入人潮有成幾十萬[3];有好多中國式嘅樓房、商店、寺廟或者學校,歷史達100多年嘅新街市係當地幾座市場中最大嘅一個。

堤岸嘅越南文國語字係「Chợ Lớn」,越南文喃字係「𢄂𡘯」。其中「𢄂(chợ)」意思係「市場」,「𡘯(lớn)」意思係「大」。「堤岸」係在越華人改嘅現代漢語名。響越南聚居嘅華人當中,以廣東人為主,其中主要係廣府人,所以堤岸嘅廣東食肆成行成市,最通用嘅語言係粵語[2]

響堤岸,好多條街係以中國人命名,包括孔子大道(Dường Khổng Tử)、老子街(Dường Lão Tử)等等。

[編輯]

1778年,住喺邊和嘅鋪洲華人社群由於支援過廣南國,而受到西山朝派兵報復嘅緣故,必須南遷去今日堤岸嘅所在地避難。1782年,呢尐華人再度受到西山朝軍隊剿殺,而必須重建居所。因為華人響河邊築起壩堤嚟防範水患,而令佢哋逐漸將「堤岸」當成呢個新居住地嘅名[1]

堤岸響1879年建市,1930年嗰陣已經擴展到胡志明市嘅邊緣,因此響1931年4月由法國殖民當局將兩者合併為「西貢堤岸市」,又叫做「西堤」[4]。1956年將「堤岸」從城市名中剔除,只係叫「西貢」[1]

越戰嗰陣時,堤岸嘅人口一度增長到100幾萬人[5],駐越美軍司令部(MACV)、美國海軍西貢支援設施(Headquarters Support Activity Saigon)同美軍超市(Commissary)都曾經設喺呢區[6],美軍將士同逃兵喺堤岸嘅大量活動形成黑市交易,好多美軍內部配給嘅物資流入越南民間[7]。1975年西貢陷落前嘅4月27號,共軍火砲曾經落入堤岸嘅民房區,造成傷亡[8]

打完仗之後,越南政府推動嘅城鄉人口政策[9]同排華政策一度造成堤岸地區華民嘅出走[5],直到去1980年代黨中央開始改善越南華僑地位為止。

參考[編輯]