梵高

梵高嘅自畫像（1889年）

梵高（Vincent Willem van Gogh；IPA：/vɑn xɔx/，聽 ^{個快勞—播}，1853年 3月30號—1890年 7月29號）係荷蘭一個後印象派畫家，佢嘅作品有強烈嘅顏色對比同情感力量，對現代藝術有好大嘅影響。

梵高後生時喺藝術品嘅貿易商公司做過嘢，去過海牙，倫敦同巴黎工幹。之後，佢喺英格蘭教書。再之後，佢想成為一個牧師去傳福音，由1879年開始，佢喺比利時嘅礦場傳道，期間佢開始以礦場嘅人作為佢嘅畫畫題材，而喺1885年，佢畫好咗佢嘅第一件重要嘅作品吃馬鈴薯的人（De Aardappeleters），喺呢個時期，佢嘅作品通常會用上較深沉嘅顏色。喺1886年3月，佢搬咗去巴黎，開始研究法國印象派嘅作品。喺1888年，佢又搬咗去法國南部嘅阿爾勒（Arles），期間佢嘅作品所用嘅顏色變得更鮮艷，藝術風格變得更成熟。

因為佢患有焦慮同精神病，喺1888年，梵高同朋友高更嗌交後，剪咗自己隻耳仔落嚟。1889年5月，梵高入咗聖雷米（Saint-Rémy）嘅精神科醫院，一年後返巴黎。1890年7月27號，佢吞槍自殺，兩日後死，死嗰時37歲。

梵高在生嗰時一啲都唔出名，當時嘅人對佢嘅作品一啲都唔欣賞。不過喺佢後死後，佢先至出名。依家好多人都認佢係世界上最偉大嘅畫家之一同對現代藝術有極重要嘅影響。梵高喺差唔多30歲先至開始畫畫，但大部份出名嘅作品，都係喺佢死前2年畫好。佢創作咗超過2000件作品，包括900幅油畫同1,100幅繪圖同草稿。依家，佢嘅好多人像、風景同向日葵作品都係好昂貴嘅世界名畫。