法國話
法國話（français），或者叫法語（寫嘅文叫法文），喺羅曼語族裏面，以講嘅人數來講，排第三。講得流利嘅，有成六千五百萬人，另外識講嘅，有一億九千萬人。羅曼語族排名，喺西班牙話同葡萄牙話後面。法國話亦係廿九國嘅法定語言。
法國話喺法國、比利時、加拿大同埋摩洛哥等國通行。其中法國口語同加拿大法文喺口語上有唔少分別，但都可以筆談。
法國話係好多國際機構嘅官方語言，好似歐盟、國際奧林匹克委員會、世界貿易組識、北大西洋公約組織、國際足協、聯合國、萬國郵政聯盟、國際刑警等等。法國語嘅地位，十八、十九世紀到顛峯，係外交嘅共通話。之後就俾英文取代，雖然係咁，法國話仍然有佢獨特地位。
法國係出版業大國，每年出版圖書大概兩、三萬本。家陣，全世界法語教師大概有二十五萬，大約有八千幾萬人學緊法國話。
[編輯] 史
雖然好多法國人，認為佢哋係高盧人（les Gaulois）嘅後裔，但係今日法國話，留有凱爾特話嘅特徵，可以話鳳毛麟角。多數字，都係來自拉丁話或者日耳曼語言。
公元四世紀，羅馬帝國統治今日法國一帶，拉丁話開始喺法國流行。到公元五世紀，拉丁話已成爲當地通行話，取代當地原先嘅凱爾特語。喺高盧境內，羅馬移民日多，高盧人同佢哋用嘅通用拉丁話，融合成為大眾拉丁語（le latin vulgaire），與此同時，上層文人用嘅書面拉丁話，亦漸見衰退。公元五世紀，民族大遷徙，外族入高盧，講日耳曼語嘅法蘭克人，同原先高盧境內講拉丁話嘅居民，兩話融合。法國話開始冇咗非重音音節。六七世紀，大眾話變成種混合性語言（un langage composite）。公元八世紀，查理曼帝國開始規範法國話。到公元九世紀，拉丁話同日耳曼話，最終融合成羅曼語。由一五三九年開始，法國話成為法國唯一嘅官方語言。
一零六六年，征服者威廉將法國話帶去英格蘭，影響英國話（例如牛肉嘅英文 beef 係由法國話 bœuf 轉成嘅；dictionary 字典，源自法文dictionnaire）。英文字當中一萬個，都係源自法文。另一方面，十八世紀歐洲各國貴族，欣賞法國嘅生活方式，法國話亦成為宮廷嘅語言。直到二十世界二十年代，法國話係歐洲外交場合嘅共同語言。
二次大戰後，英文對法文的影響都唔少，例如原先法國人會講 la fin de semaine（周末），而家會講 le weekend，又好似家陣法國人會講 le football、la drugstore 等等。但同時，加拿大英文亦有受法文影響。
[編輯] 語法
法國話入面，名詞分陰陽性，例如table（枱）係陰性詞，train（火車）屬陽性詞，ordinateur（電腦）係陽性詞，重有動詞變位。
