港式日本料理

香港食肆一份日式定食

港式日本料理係指一啲本來來自日本嘅料理，來到香港之後本地化，演變出嚟嘅菜式，算係融合菜嘅一種，香港飲食文化嘅一部分。

特色

有別於傳統日本料理餐廳，有啲港式日本料理未必會好講究環境，反而會有「超值推介」易拉架、財神吊飾、「大吉」揮春等等香港好多餐廳有嘅元素，甚至環境有啲嘈雜。

佢哋會攞咗一啲日式嘅元素，混合本地特色做法。有啲會成為個別餐廳受歡迎嘅招牌菜，但亦有啲係亂嚟。其中明將壽司可以話係其中一個表表者，事關佢哋會將任何可能嘅食材都會擺落壽司飯上面，有時甚至會成為媒體同網民嘅話題。有日本網民喺2014年來港嘗試明將壽司，形容進食嘅時候「感到地獄之門打開咗」。

另外，日式放題喺香港亦非常流行，任點任食嘅嘢食，除咗一般日式食物魚生刺身、壽司，串燒之外，有時亦會提供泰國，韓國等地嘅小食主菜。

發展

早期喺香港嘅正宗日本料理唔多，主要係居港日人幫襯。但隨著日本經濟下滑，居港日人數目喺1997年前後開始大幅下降，喺90年代開業嘅日本料理都係針對本地食客。

喺2019年10月，蘋果日報訪問咗一間喺佐敦渡船角經營嘅港式日本料理餐廳老闆。受訪嘅老闆話，呢啲港式日本料理嘅出現，好大程度係因為百分百日本人口味未必啱香港人口味。於是，港式日本料理嘅廚師就會將一啲日本嘅特色食材，混合自己嘅創意，推出一啲新嘅菜式。

元綠迴轉壽司、加太賀同埋明將壽司，可以話係日本料理喺香港嘅始祖。元綠當時仲同無綫電視合作，喺綜藝節目《超級無敵獎門人》入邊開創一個名為「辣辣壽司邊個食」嘅遊戲環節，加上用咗成龍，Twins等等知名藝人幫手賣廣告，令到當時未盛行嘅日本菜逐漸成為潮流。另外，日本料理喺香港開始流行嘅早期，有啲人會喺食魚生刺身嘅時候，蘸上大量用芥末及醬油混成嘅糊狀物。

踏入千禧年後，壽司店喺香港就如雨後春荀噉湧現，例如板長、板前、爭鮮同埋一壽司等等。另外，日式放題亦成為咗香港人同朋友聚餐其中一個主流選擇。

不過，隨著香港人對正宗日式料理認識多咗，一啲質素低劣嘅港式日本料理亦逐漸退場。例如，最後一間位於天水圍嘅元綠壽司喺2016年2月底執笠，明將壽司最後一間位於沙田分店就喺2020年4月結業。