約定的夢幻島

《約定的夢幻島》（粵拼：joek3 ding6 dik1 mung6 waan6 dou2，廣東話譯做約定嘅夢幻島，日文：約束のネバーランド）係日本《週刊少年Jump》入面連載嘅日本漫畫，原作係白井海芋，畫畫係出水Posuka（出水ぽすか），喺2016年至2020年連載，單行本共20冊。有改編嘅電視動畫同真人電影。

故仔大綱

呢個故仔嘅世界觀畀人設定做一個人族同鬼族一齊生存嘅世界，人鬼之間通過合約維持住和平。而個故仔係講三個11歲嘅細路（分別叫諾曼、雷同艾瑪）知道咗自己住緊嘅所謂「孤兒院」，其實係由鬼族貴族設立嘅專門用嚟養啲畀鬼族食嘅細路（日文：食用児）嘅飼養場（日文：農園），於是乎佢哋為咗唔畀鬼食落肚，決定諗計仔走出呢個「孤兒院」。

角色

内文：約定的夢幻島角色一覽

食用兒童

• 艾瑪

女，登場嗰陣11歲，頸上編號63194，本來住喺出產高級人肉嘅「恩典農場之家」孤兒院度，後尾同雷同部分細路逃出孤兒院。農場喺佢左耳裝咗發訊器，為咗可以成功逃走，艾瑪切咗自己隻左耳。

• 諾曼

男，喺艾瑪佢哋逃出孤兒院之前，諾曼被安排「畀人領養」，但係就冇死到。

• 雷

男，係孤兒院「媽媽」伊薩貝拉嘅親生仔。

• 柯妮

女，登場嗰陣6歲，話係畀人收養而離開孤兒院。佢走嗰日，艾瑪同諾曼見佢漏低個公仔冇搦走，就攞埋公仔走到大門度想畀番佢，點知就畀佢哋發現柯妮已經死咗。

其他人類

• 伊薩貝拉

女，孤兒院嘅「媽媽」，雷嘅親生媽媽。

• 克羅妮

女，中途調咗入恩典農場度，做伊薩貝拉嘅助手。佢想取代伊薩貝拉喺農場嘅位置，但係失敗咗。

鬼

• 穆吉卡

女，外型似人類少女。

• 孫居

男，佢因為信仰，唔食由農場養出嚟嘅人肉。佢同穆吉卡遇到畀鬼追嘅艾瑪等人，但係冇傷害佢哋。

動畫

電視動畫第1季喺2019年1月至3月響日本首播，共12集。第2季喺2021年1月至3月響日本首播，共11集。香港由ViuTV99台播放。

動畫第1季故事由艾瑪同諾曼無意中發現話係畀人收養嘅細路女柯妮原來係畀鬼殺，講到艾瑪同部分細路成功逃出孤兒院為止。動畫第2季故事承接第1季結局，艾瑪佢哋逃出孤兒院後，遇到兩個唔食人嘅鬼，然後又遇到本來以為已經死咗嘅諾曼。動畫第2季同原著漫畫比，跳過咗好多嘢，漫畫入面嘅「金色池塘」同「七面牆壁」故事都冇喺動畫版出現。

真人電影

2020年12月響日本上畫，由濱邊美波飾演艾瑪，北川景子飾演伊薩貝拉，渡邊直美飾演克羅妮。電影入面啲細路嘅出貨年齡係高過原著嘅。

拎

• （日文）週刊少年JUMP官方網站 － 「約定的夢幻島」
• （日文）「約定的夢幻島」官方網站
• （日文）電視動畫「約定的夢幻島」官方網站
• （日文）「約定的夢幻島」公式嘅Twitter