美卡挪

美卡挪 Mecano
藝人或藝術家
出道地	西班牙馬德里
活躍年代	1981年～1992年，1998年，2012年
唱片公司	哥倫比亞唱片、新力BMG
前任成員
亞娜·托羅哈（Ana Torroja） 拿楚·卡挪（Nacho Cano） 荷舍·瑪利亞·卡挪（José María Cano）

美卡挪（粵拼：mei5 kaa1 no4；西班牙文：Mecano）係個西班牙樂隊，1981年組隊，直到1992年解散。美卡挪係西班牙流行樂史上最成功嘅樂隊之一。支樂隊直到今時今日都仲係西班牙最暢銷嘅樂隊，喺全世界賣出超過兩千五百萬張唱片。喺1998年佢暫時重歸樂壇。喺佢哋嘅活躍年代，啲人認爲佢哋係支前衛樂隊。

支樂隊嘅成員有主唱亞娜·托羅哈（Ana Torroja）同卡挪兄弟拿楚（Nacho）同荷舍（José），同佢哋合作過嘅藝人有亞圖羅·提里沙（Arturo Terriza）、馬挪羅·亞基拉（Manolo Aguilar）、拿楚·馬俄（Nacho Mañó）、哈韋耶·奇李斯（Javier Quílez）、晏曉·舍拉打（Ángel Celada）、柯斯卡·亞斯特路加（Óscar Astruga）。

佢哋三個嘅音樂生涯分成咗兩個唔同嘅階段。第一階段係1985年前，基本上係支流行電音樂隊；到第二階段美卡挪向流行搖滾方向進展，融合嘅元素有民謠、舞曲、佛蘭明歌、波沙挪華、探戈、騷沙、倫巴舞、波麗露、鬥牛舞、甚至有埋雷鬼。

佢哋前所未有嘅成功亦影響到拉美。另外，佢哋又將啲歌改編成第啲語種版本，佢哋亦影響到唔講西班牙文嘅國家，譬喻意大利、法國，例如佢哋有法文歌《一個女人同一個女人》（Une femme avec une femme），呢首歌至今仲係法國排行榜上持續上榜最耐嘅歌之一。

佢哋銷量最大嘅單曲有《咁難忘記你》（Me Cuesta Tanto Olvidarte）、《命運嘅力量》（La Fuerza del Destino）、《月亮之子》（Hijo de la Luna）、《那華哈斯嘅十字架》（Cruz de Navajas）、《一個女人同一個女人》（Une femme avec une femme；西班牙文版：《女人搞女人》，Mujer contra Mujer，喺世界範圍內攞到第一嘅歌）、《9月7號》（El 7 de Septiembre）。

樂隊始末

支樂隊開頭係流行電音樂團（西班牙文叫tecno pop），成員有卡挪兄弟（拿楚、荷舍·瑪利亞）同埋主唱亞娜·托羅哈，佢哋喺1981年嘅馬德里組隊，受過英國新浪潮樂隊詩班竇芭蕾嘅影響。喺西班牙民主化之後，興起一段文化實驗時期，美卡挪憑住頭張單曲攞到佢最初嘅聲望，《今日我起唔到身》（Hoy no me puedo levantar）呢首歌唱嘅係後生細仔嘅無聊心境同埋宿醉。佢哋頭炮專輯係樂隊同名專輯，後來呢張輯評做經典，代表到1980年代嘅西班牙流行樂。

喺呢陣時，拿楚·卡挪出咗樂團去參加第啲樂隊，兩兄弟都開始幫其他流行歌手寫歌。雖然嗰啲業餘創作都未達到美卡挪樂團所攞到嘅成功水平，但對佢哋來講，呢啲都係爲美卡挪做創作嘅試驗埞方。

喺1986年，憑藉住《咁難忘記你》（Me cuesta tanto olvidarte），佢哋又試攞到大成功。支隊改革佢啲作曲方式，喺專輯《天地之間》（Entre el cielo y el suelo），佢哋以新嘅音樂風格從電音變成咗流行樂。噉就令到佢哋啲歌發行到拉美。當中最傑出、最證明到佢哋嘅作品係《月光之子》（Hijo de la Luna）。呢首歌亦都畀支樂隊遞交去參賽，作爲代表西班牙參賽隊去參加1986年嘅歐洲歌唱大賽，但TVE揀咗第支隊：卡的也喀。

佢哋接住落來嘅專輯、《禮拜日唞》，整咗兩首佢哋最受歡迎嘅單曲：《命運嘅力量》（La fuerza del destino），女演員彭妮露古絲喺呢隻歌嘅MV度首次出演，之後佢同拿楚·卡挪保持咗幾年情人關係。仲有《女人搞女人》（Mujer contra mujer），首歌講嘅係叻士關係，透過一位老友嘅視角講述，呢位老友直到最後先察覺出佢哋呢段關係。呢首歌錄咗法文（Une femme avec une femme）、英文同埋意大利文版本，爲美卡挪帶來真正嘅首次全球熱播。呢支單曲喺1989年喺拉美發行，坐咗排行榜首，兼且喺法國流行榜坐咗七個禮拜嘅榜首，從1990年11月10號坐到12月22號；呢首歌成咗法國史上最經典嘅流行曲之一。

佢哋接落來嘅專輯係《噢，達賴》（Aidalai），發行喺1991年，同佢哋之前兩張專輯一樣咁成功。

《9月7號》（El 7 de septiembre）係獻畀歌羅馬·菲能地斯·亞美羅（Coloma Fernández Armero），佢係拿楚·卡挪幾年嘅女情侶。《9月7號》係喺1992年夏天發行，係樂隊最後喺拉美排名第一嘅流行曲，首歌嘅MV發行過，佢嘅靈感出自1927年嘅德國默片《大都會》。呢張係樂隊最後嘅原創專輯。

1993年，支樂隊宣佈暫時休息。

1998年，樂隊發行咗專輯《亞娜、荷舍、拿楚》（Ana, Jose, Nacho），係張新歌加精選。嗰年遲啲時候支隊散水，三位成員單飛，各自發展，但就得亞娜一個做歌手係成功嘅。2005年，拿楚·卡挪用32首美卡挪嘅歌寫咗齣音樂劇，用佢哋第一支單曲嘅名做題名。

2005年，美卡挪嘅成員發行咗個CD/DVD套裝碟，來紀念支樂隊成立25週年。呢張輯叫做《美卡挪影錄》（Mecanografia），包含咗佢哋單曲彙編、未發行嘅歌，而DVD度有啲影片同早期演唱會嘅錄像。

卡挪兄弟係識創新嘅音樂人，會運用新技術，而拿楚係最早用Fairlight音頻工具嘅西班牙音樂人之一。（佢嘅熒屏可見於佢哋唯一嘅現場專輯嘅底面）。荷舍·瑪麗亞就話佢經常鎖自己喺房，攞辭典同書去寫佢啲歌，而拿楚就話佢去寫歌，會用節拍機起頭，然後譜旋律，而歌詞擺落最後先寫。

2009年11月，支樂隊小聚，喺嗰月月尾發咗一首新歌。

2011年11月25號，記者何舍·安東尼奧·阿維楊（José Antonio Abellán）喺ABC Punto Radio宣佈佢哋重組，喺2012年會有場世界巡演。收尾呢個否認咗。第啲媒體如報紙國家報，就確認咗呢個消息同埋個世界巡演。

發行

唱片

• 《美卡挪》（Mecano；1982年）
• 《精靈之國喺邊度？》（¿Dónde Está El País De Las Hadas?；1983年）
• 《太陽即將來臨》（Ya Viene el Sol；1984年）
• 《天地之間》（Entre el cielo y el suelo；1986年）
• 《禮拜日唞》（Descanso Dominical；1988年）
• 《噢，達賴》（Aidalai；1991年）
• 《亞娜·何舍·拿楚》（Ana/José/Nacho；1998年）

第啲發行

• 《美卡挪：全集》（Mecano: Obras Completas；2005年）呢個係個合輯，限量發售。啲CD裝喺水晶盒。入面有8張CD，都係佢哋發行過嘅西班牙文專輯，就冇包意大利文同法文專輯。呢八張唱片分別係6張錄音棚唱片、1張現場唱片、1張附加唱片，附加唱片收錄嘅係之前未發行嘅歌。
• 《美卡挪：偉大嘅成功》（Mecano: Grandes Éxitos；2005年）套裝，有三隻碟，當中兩張CD，每張CD有15首歌，包括單曲同非單曲；一張DVD，錄有20段官方影片。
• 《美卡挪影錄（影像史）》（Mecanografía (La Historia En Imágenes)；2006年）有四張DVD，入面有樂隊喺TVE（Televisión Española）嘅表演、仲有一啲未發過嘅歌。
• 喺合輯《綠色和平，拯救地中海》（Greenpeace, Salvemos al Mediterráneo；1985年）中，美卡挪錄咗首《短歌唱畀我哋離開大海之前》（Canción Cortita Para Antes que Nos Abandone el Mar）。

外文錄製

美卡挪錄過啲佢哋歌嘅英文版，之中一首發行咗做單曲：《不速之客》（The Uninvited Guest），佢係《我闖入咗個派對》（Me Colé en una Fiesta）嘅英文版。第啲美卡挪用英文錄嘅歌有：《夏威夷-孟買》（Hawaii-Bombay）《你》（You），但呢啲歌未曾公開發行過。

意大利文

美卡挪亦用意大利文錄過幾多佢哋啲歌，譬喻：

• Figlio della Luna（月亮之子）
• Croce di Lame（十字刀）
• Un Anno di Più（又一年）
• Uno di Quegli Amanti（當中一個戀人）
• Per Lei Contro di Lei（因爲佢鍾意佢）
• Il Cinema（電影院）
• Vado a Nuova York（我去紐約）
• Fermati a Madrid（留响馬德里）
• Mi Costa Tanto di Scordarti（咁難忘記你）
• Responso Positivo（積極回應）
• Anna e Miguel（安娜同米基）
• Una Rosa e una Rosa（一朵玫瑰同一朵玫瑰）
• Tu（你）
• Dalai Lama（達賴喇嘛）
• Il 7 di Settembre（9月7號）
• La Forza del Destino（命運嘅力量）

法文

美卡挪用法文錄咗啲歌，有：

• Une Femme avec une Femme（一個女人同一個女人）
• Dis-moi Lune d'Argent（話畀我聽，銀色嘅月光）
• Une Histoire à Trois（三個嘅故事）
• Nature Morte（靜物）
• Le Paradis Artificiel（人造天堂）
• Toi（你）
• J.C.
• Le 7 Septembre（9月7號）

未發行嘅歌

美卡挪有啲歌未發行過，如《Me non parle vous français》（我唔同你講法文）、《Me he declarado en guerra》（我宣佈我處於戰爭狀態）、《Cristóbal Colón》（哥倫布）、《El caballo de espartero》（織布工嘅馬）、《Solo》（孤單）、《Lía》（領呔）、《El pez》（魚）、《El romance de la niña María Luz》（女仔瑪麗亞·路詩嘅古仔）、《Arlequín》（丑角）、《Al alba》（喺黎明）、《¿Qué haces tú en el mundo?》（你喺世上做乜嘢？）。

翻唱

因爲佢哋啲歌流行，美卡挪啲歌畀幾多藝人翻唱，除咗西班牙文世界，喺之外嘅音樂圈亦都有人翻唱。《天地之間》中嘅歌畀芒特石剌·卡芭耶（Montserrat Caballé）同埋舍莉亞·吉路斯（Celia Cruz）翻唱過。另外，未發行嘅歌《領呔》畀亞娜·比倫（Ana Belén）唱出。歐陸舞曲歌手露娜（Loona）喺1998年翻唱咗《月亮之子》，成爲一時勁歌。歌手羅拉·布拉尼根（Laura Branigan）喺佢1993年專輯《喺我心中》（Over My Heart）中錄咗版《女人搞女人》。2008年，墨西哥歌手達尼拉·羅摩（Daniela Romo）亦翻唱呢首歌，收喺專輯《夢幻歌舞》（Sueños de Cabaret）。

2004年，墨西哥流行歌手菲（Fey）錄咗張專輯《命運嘅力量》（La Fuerza del Destino），呢張係翻唱輯，12首歌全部都係美卡挪嘅歌。呢張輯喺2005年攞到拉丁格林美獎嘅提名。哥斯達黎加嘅拉丁格林美獎得主艾迪圖斯（Editus）亦翻唱過歌《月亮之子》，收喺佢哋專輯《始終……》（Siempre...）。

西班牙文圈之外亦有翻唱者，譬如莎拉·布萊曼，佢唱咗《你》（Tú）、《月亮之子》、《靜物》（Naturaleza Muerta）。馬里柯·佛蘭古利斯（Μάριος Φραγκούλης）翻唱過《月亮之子》同埋《靜物》。比利時嘅西班牙裔歌手比勒·丕利茲（Belle Perez）亦同樣如此翻唱過。希臘歌手海倫妮·迪姆（Ελένη Δήμου）翻唱咗《月亮之子》嘅希臘文版《月光落緊山》（Πέφτει το φεγγάρι）。

西班牙重金屬樂隊斯特拉華間沙翻唱咗歌《月亮之子》做錄音單曲，叫《恐懼之子》（Hijo del Miedo）。

跨界女高音謝拉甸·拉羅莎（Geraldine Larrosa）翻唱咗《靜物》嘅法文版、西班牙文版。

巴西嘅新浪潮樂隊地下鐵喺1985年專輯《睇》（Olhar）中翻唱咗葡萄牙文版嘅《夏威夷-孟買》。葡萄牙歌手佐舍·士治亦翻唱咗呢版。