同位異音

同位異音，係語言學術語，指幾個唔同嘅語音對應到同一個音位。又叫做同位音、音位變體。由於每種話嘅音位配置都唔同，所以兩個音係唔係同位異音，要視乎語言而定。一般來講，同一個音位嘅異音，即使撈亂來用，都唔會影響意思，因為以嗰種話為母語嘅人，聽說話時自然會唔理同位異音嘅分別，將佢呢嘅音睇成係「一樣」。不過，撈亂同位異音來用，會令聽嘅人覺得唔自然、有外地口音。

譬如粵語裏面，有個音位/i/，多數讀[i]（如：思（[si˥˥]）、閃（[sim˧˥]）、蝕（[sit˨]），但係響韻尾/-ŋ/同/-k/之前，就讀[ɪ]（如：聲（[sɪŋ˥˥]）、色（[sɪk˥]））。咁即係話，[i]同[ɪ]呢兩個語音，係同位異音，對應到音位/i/。即使你撈亂呢兩個語音，例如將「聲」讀成[siŋ˥˥]（好似普通話嘅「星」咁讀），又或者將「閃」讀成[sɪm˧˥]，意思都係一樣，但係就會令人覺得你帶有外地口音。

又好似普通話入邊嘅/e/可以用來表示「德」嘅母音[ɤ]，又可以表示感嘆詞「呢」嘅母音[ə]，咁樣[ɤ]同[ə]喺普通話入邊就系同位異音，佢哋嘅共同音位係/e/。