香港警察沈迷同經營賭博爭議

多年嚟，香港警察都被報導，有警員沉迷，甚至自己經營賭博。有部分意見就認為，紀律部隊工作性質同埋警隊內部賭風，會容易令人沉迷例如賭博呢啲不良嗜好，最終可能會走投無路，輕則無咗份工，重則為解決債務而知法犯法甚至自殺。

成因

令一啲警員去到病態賭博嘅地步，部分原因包括香港警察內部嘅賭風，同埋警察嘅工作壓力。有成功戒賭嘅警察過來人，曾經喺戒賭服務機構入面分享，提到80年代嘅時候，警察入面賭風十分風盛，已成為同事之間社交、消遣娛樂嘅首選，差館入面每日都可以接觸到麻雀、啤牌、十五湖等等。另外，香港警察以諾團契牧師陳一華接受訪問嘅時候提到，紀律部隊工作壓力大，又要輪更，工作內容又涉及機密，加上「埋堆」文化無正常渠道宣洩，容易令人沉迷賭博。

事例

• 2001年，香港《蘋果日報》同英國BBC報道，有警察涉嫌參與經營非法賭波集團，大約有100名警員因為事件而被調查。
• 2011年2月，西九龍總區衝鋒隊37歲車長江偉達，因為沉迷賭博欠債，要接受內部調查，後來喺警署露天停車場嘅衝鋒車內，向左胸開槍自殺，重傷送院。
• 2011年9月，輔警蕭玉萍因為欠債，喺荃灣警署洗手間，向自己太陽穴開槍，自殺身亡。
• 2013年7月，警員陳亦文喺警署向自己太陽穴開槍，自殺身亡。
• 警長李鴻發稱因為壓力過大而沉迷賭博，喺2016至2019年期間呃咗警察儲蓄互助社貸款逾45萬元，而且仲去賭外圍馬，結果被判240小時社會服務令。
• 2021年4月，曾獲最佳警員獎嘅警員吳衍鋒，因為經營賭博場所被捕，佢求情嘅時候提到自己因為投資比特幣失敗而犯案。

香港警察相關處理措施

喺2003年，香港警察以諾團契牧師陳一華接受訪問嘅時候提到，而家警方會要求警員前往澳門時要申報，亦有舉行教育講座，內部亦會為警察提供輔導，又有推廣一啲有益身心嘅活動。不過，有警員就話，就算警隊嘅心理專家話保密，有債務問題嘅人都唔敢去見，擔心會被革職。

相關影視作品

電視劇

年份	製作單位	作品名稱	有關情節
2012年	香港電台	《賭海迷徒2012》 - 第8集《槍後七日》	以宣揚反對病態賭博為主題，李國麟、李家聲飾演沉迷賭博嘅軍裝警員，後者自殺後，前者陷入困局，知道唔可以咁落去，但又擔心被上司知道後會失去公職同埋有關嘅福利，但最後選擇向上司坦白。