鬼佬

鬼佬（讀音 : guãy lõw）或者番鬼佬即係高加索人，係廣東話嘅俗語，響普通話俗語就叫「洋鬼子」。跟字面解即係「鬼佬」，由於廣東人觀念認為高加索人大多數都係紅鬚綠眼，又或者源自19世紀因外國軍隊入侵中國，而產生「鬼佬」呢個詞 。連英文都有gweilo呢個字。

類似嘅，高加索女人叫鬼婆，細路仔叫鬼仔，細路女就叫鬼妹。衍生出嚟，有人叫黑人做黑鬼。有啲高加索人認為「鬼佬」呢個稱呼係對佢哋嘅侮辱。響1980年代，有啲廣東人響「鬼佬」呢個詞前面加個「死」字，即係詛咒對方去死，而成為一句帶有侮辱性嘅粗話。

好多以粵語為母語嘅人響公衆地方，仍然用「鬼佬」呢個詞稱呼高加索人或者西方人，佢哋認為呢個詞冇貶義同爭議。「鬼佬」呢個詞更出現響香港嘅兒歌，當時都冇人認為有問題。

有啲白種人覺得鬼佬呢個稱呼係對佢哋嘅侮辱。重有根據香港法例，喺一個工作地方、學校、公共機構等，任何人如基於另一人嘅種族…作出唔受歡迎嘅行徑（可包括口頭或者書面陳述）…作出嗰個行徑嘅人即屬對嗰另一人作出騷擾（原文：第602章 第7條 種族騷擾）。即係話如果對方唔歡迎或者唔鍾意呢啲稱呼，叫佢「鬼佬」有機會會犯法。喺另外一方面，而家有啲住響香港嘅外國人偶然都會笑笑咁自稱「鬼佬」，呢點反映出思想開始變化，由當呢個詞係污蔑至入鄉隨俗。

相關嘅詞

一張大概印製響1899年嘅義和團小册子，紙上稱外國人為鬼子。

普通話中嘅鬼子同「鬼佬」同義，但係多數形容日本人，而且有唔友好嘅意思，如「日本鬼子」、「東洋鬼子」，電影《鬼子來了》即描寫抗日戰爭期間嘅事；而白種人就稱為「洋鬼子」。近年多咗用「老外」呢個比較友善嘅詞作為對白種人嘅稱呼，重有紅毛鬼子等等。