義和團

出自維基百科,自由嘅百科全書
跳去: 定向搵嘢

義和拳,又叫做義和團,係中國19世紀末一個反西方嘅組織。佢哋認為自己練嘅拳係刀槍不入,唔怕洋鎗大炮。呢個組織1900年(庚子年)響山東搞咗場好大型嘅暴亂,史稱義和團之亂。呢場暴亂又叫做義和拳匪亂庚子事變庚子拳亂。個組織係針對響中國嘅外國人,成員見到人就亂打亂殺,見到有關嘅嘢唔係燒就係柝,連同西方有關嘅華人都一樣遭秧。後尾引起西方社會反彈。大清政府因為啱啱經過戊戌政變,朝中一班較為開明有為嘅大臣都被貶,北京由一班頑固、守舊更夾愚昧嘅死蠢當政,最後招致八國聯軍圍攻,搞到首都北京城被攻佔,要賠款,影響深遠。之後嘅大清政府,或者中華民國政府,都認為呢場係暴亂,參與嘅人都係愚昧無知。而中國共產黨,認為呢班人係愛國,係反抗西方強權嘅象徵,呢單嘢係民族起義,所以就將呢件事叫做義和團起義

截至1900年8月,總共有超過240名外國人、2萬幾名中國基督徒,以及數都數唔晒嘅義和團拳民,佢哋支持者,以及其他人在呢場運動及之後嘅鎮壓中死亡。如果將義和團事件同八國聯軍攻打北京兩件事夾埋一齊計。咁畀人殺嘅總共有天主教主教五人,教士四十八人,教友一萬八千人,新教教士一百八十八人,教友五千人。

義和拳嘅成員畀人叫做「拳民」或者「拳匪」。義和拳原本係長期流行響山東、直隸(今河北)一帶嘅民間秘密會社。義和拳利用設立神壇、畫符請神等嘅方法秘密聚眾,教授信眾修煉一種據稱可以令人刀槍不入嘅拳法,即係「義和拳」。義和拳其實同神打差唔多,都係起壇作法,令人迷迷糊糊,念咒語然後請神仙上身,然後自以為刀槍不入。呢庭法術係中國民間,特別係無受教育嘅一個階層一向都有流行。好似太平天國嗰班“王”最初作反一樣成日請神上身,不過太平天國請上身嘅係上帝、耶穌;而義和團就請埋齊天大聖、關公等等小說人物。最初義和拳同當時清朝大部份黑社會一樣,反對滿族統治,以「反清復明」為口號。遭到鎮壓之後,轉而支持大清而極力排外,口號改為「扶清滅洋」(1898年由趙三多首次提出)。