黃埔區中山公園

黃埔區中山公園嘅中心湖

 黃埔區中山公園（粵拼：wong4 bou3 keoi1 zung1 saan1 gung1 jyun2*4） 係中國廣東廣州嘅一間公園，喺大清光緒十九年（1893年）起好，位置喺黃埔區長洲中間。佢亦係廣州首間公園，門口上面嘅「黃埔公園」四字係由兩廣總督岑春煊喺1903年寫出嚟。

史

雖然有關公園落成嘅文字記錄已經好難查證，但流傳得最多係大清光緒十九年間，兩廣總督李瀚章撤銷咗黃埔船局，畀返魚雷局無耐，喺柯拜船塢（而家長洲中部偏東南）附近搞咗間公園。嗰時之前，廣州重未有任何休閒舒適嘅公園。1917年7月6號，孫文南下廣州進行護法運動時，率先喺呢間公園登陸，重喺附近開咗間軍校；嗰晚重喺公園搞咗歡迎會。同年8月18號又喺呢間公園開咗宴會嚟招待跟孫文落咗嚟嘅國會議員喺一個禮拜之後（1917年8月25號）開非常會議，決定成立中華民國軍政府，孫文喺當年9月1號做咗政府海陸空軍大元帥之後，又喺呢間公園接受咗受印禮。

民國15年（1926年）底，黃埔軍校方準備出錢起另外兩間公園時，順手將黃埔公園整大咗兼改名做中正公園。1947年，駐島海軍喺公園嘅山頂起咗棟名叫「中正樓」嘅兩層洋樓，但文革破四舊時拆冧咗。中華人民共和國成立之後，公園改名做「中山公園」，後嚟為咗紀念孫文而整咗孫總理紀念碑。

攷

• 孫中山活動遺蹟及紀念地資料庫
• 黄埔公园 黄埔军校旧址纪念馆
• 百岁公园故事多 广州文史