上海理髮

上海理髮係飛髮𠲖行著名嘅一派；上海理髮舖喺港澳都曾經常見兼且地位甚高；其技術主要嚟自揚州嘅飛髮師傅，佢哋好多去咗上海開工，風格別樹一幟。

1940年代有好多上海以及附近嘅江蘇同浙江人，湧入香港定居（目的地為澳門嘅都有^[1]）。由於早些少時，上海好繁榮，因此上述新移民爭住自認上海人，並且好鍾意用呢個地名嚟宣傳生意，令「上海理髮」呢個稱呼變得好流行。

現存上海理髮鋪嘅格局多數都好懷舊，同粵語長片當中嘅相似。家陣呢個流派已經式微，沿用此傳統營業嘅多數都係老師傅，經驗豐富，年紀唔細，比較講究嗰啲開工時會着白衫制服外套同西褲。架生有古董飛髮椅、頭枕，搭磨剃刀用皮帶。古董椅以西德來佬貨最架勢，剃鬚時會調校高低，同向後拗，椅背變床，椅腳重可以氹氹轉。