上行之詩

出自維基百科,自由嘅百科全書

上行之詩又稱為台階詩,係《聖經》《詩篇》第120至134篇。每首都有「上行之詩」嘅標題,「上行」呢個詞喺希伯來文係一個名詞加上冠詞。包含咗步級、台階、上升、攀登嘅意思。思高譯本叫呢十五首上行之詩做「登聖殿歌」[1]

標題意思[編輯]

上行之詩嘅標題,喺希伯來文聖經係用「上行之『歌』」,可以唱誦嘅。上行之詩有幾個解釋:

  1. 被擄回歸
  2. 上耶路撒冷朝聖(一年三次守節)
  3. 聖殿台階

可能係被擄回歸嘅路上,或者係上耶路撒冷過節朝聖嘅時候,又或者喺踏上聖殿台階嗰陣,邊行邊唱。有學者認為未必係個人獨唱,祭司頌唱,更有可能係一班被擄回群嘅人或去朝聖嘅人合唱或對唱,例如第121篇。

概覽[編輯]

上行之詩就好似成本《詩篇》一樣,係經過輯錄嘅作品,可以配上曲調唱頌嘅。上行之詩有五首有標示作者:第122、124、131、133篇係大衛上行之詩,第127篇係所羅門上行之詩。但係希伯來文喺大衛同所羅門之前嘅前置詞lě,除咗可以理解為「大衛/所羅門所作」,亦可以翻譯為「為大衛/所羅門而作」、「獻畀大衛/所羅門」等。十五首上行之詩喺第五卷(107-150篇),可以算係詩集中嘅詩集。上行之詩好似串燒歌噉,每一篇嘅篇幅都比較短,方便背誦同唱頌。

焦點[編輯]

上行之詩嘅焦點係錫安,係上帝嘅居所,亦即係話詩人以上帝為生命嘅焦點。詩人藉住人生嘅經歷:面臨仇敵嘅壓逼同攻擊、仰望上帝嘅拯救同幫助、被擄回歸、重建、朝聖等,宣告信仰嘅信心、盼望、勉勵人回歸創造天地同拯救嘅真神。正係反映同記述信仰生命嘅旅程,喺呢個歷程之中,詩人以錫安或耶路撒冷作為目的地,以上帝為最終嘅依靠同歸宿。上行之詩提醒我哋,人生就好似一個旅程噉,喺當中有甜、酸、苦、辣唔同嘅經歷同感受,有被人欺壓,甚至被擄、亦有回歸、重建、安居、朝聖...等情況。但係,最終嘅目的地係到上帝嘅居所、朝見神、同上帝喺一齊。

結構[編輯]

上行之詩可以分為五組,每組三首。

寄居嘅旅程(120-122)
  1. 寄居者嘅禍困
  2. 寄居者嘅保護
  3. 寄居者嘅禱求
朝聖嘅旅程(123-125)
  1. 朝聖者嘅仰望
  2. 朝聖者嘅幫助
  3. 朝聖者嘅依靠
回歸嘅旅程(126-128)
  1. 回歸者嘅栽種
  2. 回歸者嘅建造
  3. 回歸者嘅蒙福
上行嘅旅程(129-131)
  1. 上行者嘅仇敵
  2. 上行者嘅省察
  3. 上行者嘅滿足
敬拜嘅旅程(132-134)
  1. 敬拜嘅旅程
  2. 合一嘅旅程
  3. 事奉嘅旅程

參考[編輯]