下坑

下坑，香港一村，喺大埔，汀角路邊，大埔工業邨北便，英文寫Ha Hang。原本喺大埔海邊，背靠大山，有條水叫下坑流出海。坑即係涌溪之類，香港地名常見。如今海面已畀填地冚實。行政上歸大埔區，鄉事歸大埔鄉事委員會。村人以李氏為主，有李氏家祠二，李氏宗祠一。

因村之故，又叫下坑村，英文寫Ha Hang Village。附近山地以及就近建設，都以下坑命名，如山上下坑食水配水庫。下坑原村喺西面，所以祠堂喺依處，後起嘅丁屋，就喺東面，下坑村公所亦喺依便。有啲丁屋地賣咗，變咗私人屋苑百星匯。村東面有政府公務員宿舍，名下坑政府職員宿舍。

下坑有啲村路，有名得一條，叫汀慶路，由大路汀角路入。汀角路同汀慶路之間，有下坑村休憩處。村內亦設有政府公廁，名下坑村公廁。

下坑西面越山就係鳳園，東面越山就係屋苑淺月灣，即香港教育大學對落。

史

下坑為原居民村，亦即英國人得到新界之前，已經立村居住。原村喺西面山腳，海邊對上高少少嘅地方。海邊亦有灘。佢東面有兩條大山坑，耕地就沿海皮，以兩條山坑深入谷內。故此下坑之名，就涵蓋依啲地方。

未起汀角路之前，海邊已有條徑。古道闊有四英尺，已經鋪石，西沿大埔海去到大埔墟，東沿船灣海去到汀角、大尾𡰪等村。及後汀角路亦沿古道而建。

攷

• 〈下坑〉。