中國國家運動選手禁藥爭議

由1980年代開始，中華人民共和國喺夏季奧運會同其他國際體育賽事入面攞到唔少獎項，但有部分中國選手喺訓練期間使用運動禁藥，造成西方世界一啲批評同拗撬。

部分事例

1990年代，由中國大陸女子田徑教練馬俊仁訓練嘅女子長跑好手，被強行服食興奮劑同埋男性荷爾蒙等體育禁藥。
喺2008年夏季奧林匹克運動會，中國嘅舉重選手陳燮霞、劉春紅、曹磊因為食咗運動禁藥，雖然攞咗金牌，但之後被褫奪獎牌^[1]。
中國泳將孫楊曾經唔止一次服食因為禁藥而被質疑。2014年，佢因為過唔到尿檢而被禁賽3個月。佢聲稱自己因為心臟不適而誤食禁藥，但好多人都唔接受佢解釋。去到2016年奧運，澳洲泳將馬克霍頓(Mack Horton)甚至發起「拒絕孫楊」行動，拒絕同孫楊握手，又以「禁藥老千(drug cheat)」稱呼孫楊，法國泳將拉寇爾（Camille Lacourt）亦爆料，話佢嘅尿液顏色呈現紫色。去到2018年9月，孫楊喺位於杭州嘅住所，拒絕國際藥檢管理機構進行嘅飛行藥檢，仲要指使他人打破血液樣本容器，結果被判罰禁賽8年^[2]^[3]。不過，由於有拗撬嘅檢測之前同埋之後嘅測試結果一樣陰性，因此並唔認定孫楊存在食禁藥行為，佢之前贏得嘅成績與獎牌仍然有效。孫楊方面唔滿意判決，並決定上訴去瑞士聯邦最高法院。2020年12月，瑞士聯邦最高法院支持孫楊嘅上訴，撤銷CAS嘅8年禁賽裁決，將呢件案件發還重審。2021年6月，CAS經二次聽證會後宣佈，孫楊停賽期減到4年3個月。