中天新聞台冇獲續牌事件
中天新聞台冇得續牌事件，係指喺中天新聞台喺2020年11月續牌申請被拒之後所發生嘅一連串事件。
2020年11月18號，台灣國家通訊傳播委員會（NCC）以多次違規、內控機制失靈、持有人蔡衍明嚴重介入新聞製作，冇落實新聞專業同唔自律等多個理由，加上喺2014年續牌嗰時已經提出過有關問題、之中天新聞冇正視到，最終以7:0一致否決中天新聞台嘅續牌申請[1][2]。
事件背景
[編輯]政治立場問題
[編輯]中天新聞台嘅政治立場不溜捱視為親北京，而且自2018年起，仲不遺餘力噉追捧嗰陣時嘅高雄市長、即之後代表國民黨參選2020年中華民國總統選舉嘅韓國瑜。嗰陣佢哋同韓國瑜有關嘅報道比例超過五成，係全台最高。佢哋甚至將天空出現「鳳凰展翅」嘅雲朵、同埋加拿大華裔女導演嘅片《包子》獲得奧斯卡最佳動畫短片，都歸功於韓國瑜[2]。
違規同埋內部調節機制失衡
[編輯]NCC喺宣布決定嗰陣提到，中天新聞台自2014年起至決議日總共違規唨25次，啲主要問題包括冇做到事實查證、妨害公序良俗等；其中2次捱警告、23次捱罰款，合共1,153萬新台幣（約313萬港幣），數字係全台最多；啲觀眾投訴個案由2017年嘅72宗暴增去到2019年嘅962宗，佔電視類投訴量嘅31.55%。另外，中天內部啲控制同埋自律機制失嗮靈，佢對觀眾投訴問題未能做到自我修正、個新聞部主管又長期懸缺、啲內部訓練亦經常同個新聞專業無關；蔡衍明甚至用唨唔同嘅方式（例如經由前新聞事業副總裁邱佳瑜）介入中天新聞台製播，違反唨中天自訂嘅「新聞自主公約」；而且中天新聞台申請續牌期間提出嘅改善承諾，都冇辦法有效噉說明點樣先排除到啲嚟自股東嘅不當干預[1][2]。
正式宣布
[編輯]NCC喺2020年11月18號，決定唔畀中天續牌，意味著中天電視台將會喺12月11號之後失去佢衛星廣播頻道嘅執照、12月12號開始唔得喺有線電視播出[1]。
後續反應
[編輯]呢個決定引起咗台灣社會嘅好大關注，另外國際社會亦都有少少聲音關注緊呢個事件[3]。台灣政府當局同民進黨都話、尊重台灣國家通訊傳播委員會獨立專業嘅決定；時代力量歡迎呢個決定；但係中天電視同國民黨就都有唔同人表示緊不滿。中華人民共和國政府亦有一啲官方機構干預事件，聲援中天，但就反被NCC嘅人揶揄中國無言論自由，想申請都無。
台灣政府當局
[編輯]總統府、行政院喺11月19號一致表示，尊重獨立機關依法做成嘅專業決定。總統府發言人張惇涵喺11月19號下晝表示，台灣係民主法治國家，依照衛星廣播電視法、電視頻道嘅執照逢親6年要審查過一次，並由獨立機關NCC進行審查、依照審查嗰陣現行嘅審查方法；所有電視頻道都唔會係例外。行政院秘書長兼發言人李孟諺就話，中天新聞台係因為冇通得過NCC嘅獨立審查（先至唔得續牌）；NCC所有委員都係學者專家，亦通過唨立法院嘅嚴格審查；行政院尊重NCC獨立行使職權所做嘅決定[1][4]。
台灣國家通訊傳播委員會
[編輯]針對有人話呢個係個政治決定，NCC主委陳耀祥就話，個事件冇任何政治勢力介入，只係要話畀所有啲要買媒體嘅財團大老闆聽，要尊重返新聞專業自主，同新聞保持返一定嘅適當距離[2]。面對中華人民共和國國台辦嘅批評，副主委翁柏宗就強調話，包括審查項目、評分基準都好明確，一切都係依法行政，並無審查到電視台嘅政治立場，佢反而唔點名批評緊中國無新聞自由，「連申請都冇辦法」噉[3]。
中天電視
[編輯]- 中天電視指控呢個係個政治判決，話所有人都知道係蔡英文政府要中天收聲，又話會用唔同嘅法律手段爭取返員工嘅工作權同埋新聞自由[2] 。
- 中天大股東蔡衍明形容，個事件完全就係政治操弄[5] 。
- 中天新聞台《文茜世界周報》節目主持人陳文茜就表示，同意中天係唔夠自律，但反問其他電視台夠自律唔夠，又話從來冇人閂得佢哋嘅節目，就算係總統[5] 。佢又批評話，蔡英文心中冇言論自由價值[6] 。
國民黨
[編輯]喺總統大選期間得到過中天電視台支持嘅韓國瑜，喺續牌決定公佈前，多次公開噉聲援中天。[7]去到正式公佈拒絕續牌結果嗰陣，佢形容呢次事件爲「七個小矮人摧毀台灣新聞自由」[5][8]。
民主進步黨
[編輯]民主進步黨發言人劉康彥話，新聞媒體具有公共性、公益性，對社會有高度滲透同埋強大嘅影響，由獨立審查機關對更換電視台執照進行嘅定期審查，喺民主政體係標準做法，唔涉及侵害新聞自由。劉康彥又批評話，國民黨假藉「新聞自由」嘅名義、假稱民主國家個個都唔會撤照，係公然嘅魚目混珠；又提及前總統馬英九，佢任內亦都曾經撤除年代綜合台嘅牌照；喺對事實公平有愈發嚴謹要求嘅英國，過去亦都有撤除過新聞台執照嘅案例。佢又話，民進黨捍衛新聞同埋言論自由，呼籲國民黨停止政治操作，回歸理性討論，摒除自身政黨利益盤算，尊重返NCC專業審查嘅決定[4]。
時代力量
[編輯]時代力量前立委、參與開「反旺中」運動八年嘅黃國昌喺社交媒體發表唨題爲「終於，向蔡衍明的中天告別了」嘅文章，表示感謝咁多位之前嘅努力同埋堅持，並重申過話媒體公器唔應該淪為大老闆嘅工具[5]。
無國界記者
[編輯]無國界記者台灣分會表示，對受影響嘅中天新聞台員工深表遺憾，但唔認為NCC嘅決定有侵害到新聞自由、審查中天新聞台執照符合正當性[2][5][9]。
其他台灣公眾人物
[編輯]網絡紅人兼律師呂秋遠表示，呢個決定對於好多家庭嚟講、係相當大嘅福音，以後都唔使為轉台問題而嘈交。佢又比喻話，六年前補考已經通知唨要改善，六年後經過七名委員重新審查過、照舊係以懸殊嘅比數決定唔畀續牌，唔可以歸咎話係新聞自由俾人扼殺[10]。
國台辦話[11] NCC 唔畀中天電視續牌係民進黨「用政治手段打壓異己」、「已經引起台灣社會各界普遍質疑同強烈批評」中共黨媒《人民日報》都出文話[12]中天電視冇得續牌係民進黨「打壓異己」、「為咗煽動恐中抗中不擇手段、胡作非為。」
參考
[編輯]- ↑ 1.0 1.1 1.2 1.3 黃有容、何醒邦 (2020-11-19)。〈NCC列四大理由 不予中天新聞台換照〉 (中文)。聯合報。喺2020-11-25搵到。
- ↑ 2.0 2.1 2.2 2.3 2.4 2.5 〈屢罰不改 蔡衍明涉介入製播 中天新聞台不獲續牌〉。am730。2020-11-19。原著喺2020-11-27歸檔。喺2020-11-25搵到。
- ↑ 3.0 3.1 楊綿傑 (2020-11-25)。〈中國國台辦不滿中天換照未過 NCC反嗆：有些國家還沒得申請〉 (中文)。自由時報。喺2020-11-25搵到。
- ↑ 4.0 4.1 溫貴香 (2020-11-19)。〈中天換照遭駁 府院：尊重NCC依法決議〉 (中文)。中央通訊社。喺2020-11-25搵到。
- ↑ 5.0 5.1 5.2 5.3 5.4 遠見編輯部 (2020-11-19)。〈中天新聞台被鍘！郭台銘、陳文茜、韓國瑜他們這樣看…〉。遠見雜誌。喺2020-11-25搵到。
- ↑ 黃順祥 (2020-11-24)。〈「沒有為民主自由奮鬥過一天」 陳文茜批蔡英文心中無言論自由價值〉。《新頭殼新聞網》 (中文)。喺2020-11-25搵到。
- ↑ 〈中天換照｜若關台！韓國瑜「臺灣民主也會關門」〉。《蘋果新聞網(台灣)》 (臺灣中文)。2020-10-20。喺2020-11-25搵到。
- ↑ 周怡孜 (2020-11-18)。〈中天新聞台換照被駁 韓國瑜說話了〉 (中文)。鏡週刊。喺2020-11-25搵到。
- ↑ 〈無國界記者：NCC不予中天新聞台換照令人遺憾，但不涉及侵害新聞自由〉。《獨立評論@天下雜誌》 (中文)。2020-11-19。喺2020-11-25搵到。
- ↑ 黃順祥 (2020-11-19)。〈中天新聞台換照遭駁 呂秋遠：同意換照才是傷害新聞自由〉。《新頭殼新聞網》 (中文)。喺2020-11-25搵到。
- ↑ 〈中天新聞不獲續牌 國台辦批以政治手段打壓異己〉。《頭條日報》。2020-11-25。原著喺2020-12-01歸檔。喺2020-11-26搵到。
- ↑ 陳政錄 (2020-11-25)。〈裁判球證旁證全是我的人！ 陸官媒引《少林足球》台詞批中天案〉。《ETtoday新聞雲》。喺2020-11-26搵到。