中環長洲渡輪，正式名中環往來長洲航線，係香港一條渡輪航線，往來往中環五號碼頭同長洲碼頭，而家由新渡輪經營。
呢條航線喺1938年11月7號開辦，嗰時唔係直接到長洲，需要經坪洲同大嶼山梅窩，舊時係由油麻地小輪營辦。2000年頭，油麻地小輪畀政府收回專營權後，改由新渡輪接辦到而家。
由於呢條航線曾經係長洲唯一直接往返市區嘅航線（唔似得梅窩同坪洲有其他替代交通），所以客量一直維持喺高水平，尤其係假日。
2015年8月8號，翠華船務旗下Maris Ferry營運香港仔往來長洲航線啟航，由於香港仔交通唔夠中環方便，班次比呢條航線疏好多，所以對呢條航線客量影響唔大。
