中產返貧

中產返貧係指中產階層（middle class）嘅人，因為經濟下行，經濟活動減慢，佢哋從事嘅專業同技術工種嘅需求放緩，令到佢哋陷入失業危機，加上經濟下行亦都令到佢哋嘅投資失利，甚至變成負資產，喺收入同投資兩邊都唔掂嘅處境之下，佢哋跌出咗原本嘅中產階層，被迫去打啲低收入嘅工，甚至要去攞綜援。

中產階層

中產階層（middle class）係指現代社會嗰度，經濟相對獨立，收入相對穩定嘅一個社會階層，喺香港又叫做「夾心階層」，喺中國又叫做「小康階級」。中產階層嘅範圍好闊，通常嘅定義係一個國家裏面，唔包括最低層嘅20%， 同埋最高層嘅20%，嘅中間階層嘅人。佢哋通常喺專業人士（例如：教師、工程師等）、中小企業嘅老細、經驗豐富嘅藍領（例如：工頭、技術員、熟練技術工人等）或者係經驗豐富嘅白領（例如：銀行之類服務業嘅客戶經理、資深銷售員、資深文員等）。

中產返貧嘅原因

根據香港經濟日報嘅綜合分析，中國「中產返貧」嘅10個原因係：

1. 經濟下行。
2. 房地產危機。
3. 未及時適應市場變化。
4. 依賴單一收入來源。
5. 過度消費。
6. 高風險債務。
7. 缺乏財務規劃。
8. 沒有保險和養老金計劃。
9. 盲目跟風投資。
10. 投資單一。

呢啲原因基本上可以分成：外部因素（經濟環境嘅惡化）、個人因素（自己嘅理財策略錯誤）兩大方面，呢啲因素可能發生喺任何國家嘅中產階層。

應對方法

避免中產返貧嘅應對方法，基本上可以分為政府同個人兩個方面。

政府方面

當經濟唔好嘅時候，中央銀行可以透過三種方法去刺激經濟，從以令到中產唔會「返貧」：

• 中央銀行可以透過降低利率，嚟降低借貸成本，同埋減少儲蓄傾向（propensity to save）。降低借貸成本可以鼓勵投資、而減少儲蓄傾向可以刺激消費。
• 如果利率已經好低，再降低利率已經無可能，中央銀行亦都可以用量化寬鬆（Quantitative Easing）嘅貨幣政策，透過買政府債券或者係其他金融資產嚟刺激經濟活動。2007年‍–‍2008年全球金融危機嘅時候，英國同埋美國政府都曾經用過量化寬鬆嘅方法去將經濟帶返去正常嘅軌道。
• 中央銀行亦都可以用降低存款準備金比率（Required Reserve Ratio）嘅方法，減少對銀行保留準備金嘅百分比要求，增加銀行可以發放貸款嘅數量，從而創造躲啲貨幣供應量。

除咗上面講嘅貨幣政策，政府亦都可以用財政政策去刺激經濟，令到中產唔會「返貧」。同貨幣政策唔同，財政政策嘅目的唔係鼓勵（或限制）企業嘅投資支出，或者個人嘅消費支出，而係針對經濟總量嚟做調節嘅政策，呢啲政策包括：

• 增加總需求：如果經濟下行嘅原因係商業活動唔夠多，咁樣增加政府支出就可以增加總需求，從而增加整體嘅經濟活動嘅水平。根據凱恩斯嘅宏觀經濟學理論，生產同就業嘅水平，係由總需求嘅水平決定。總需求係整個經濟系統裏面，對商品同服務嘅需求總量，所以如果經濟下行係因為需求引起，咁增加需求就會係最簡單而直接嘅方法。如果私人消費增加唔到，咁政府嘅消費（例如增加基建開支、社會福利等）可能係最容易嘅方法，如果政府嘅支出增加，而所有其他支出組成部分都保持唔變，咁整體需求就會增加。
• 增加轉移支付（transfer payments）：政府除咗可以直接增加支出之外，政府亦都可以直接俾錢市民，例如歐洲、英國、美國、日本等國家喺2020至2022年間嘅直升機灑錢（helicopter money）或者增加綜援金額等，增加市民嘅可支配收入（disposable income），從而增加市民嘅消費額，令到整體需求增加。
• 減個人稅（personal tax reduction 或者 individual tax reduction）：政府減少個人課稅額（例如降低薪俸稅、消費稅等），亦都可以增加市民嘅可支配收入（disposable income），令到消費需求增加，從而令到整體需求增加
• 減商業稅（business tax reduction）：政府減少商業課稅額（例如營業執照開支、利得稅等）會降低營商成本，從而增加整體需求，增加就業機會。

呢啲財政政策都可以增加整體需求，整體產出就會增加，經濟就會回覆正常，中產嘅就業機會增加，就唔會「返貧」。

個人方面

長遠嚟講，因為有通貨膨脹，經濟周期都係向上嘅，所以手上嘅現金會越來越唔值錢。為咗減少受到現金貶值嘅影響，適當嘅投資變得好重要。但係投資係有風險嘅，如果能夠低買高賣，咁就會「財息兼收」，既可以賺到資產買賣嘅升值差價，又可以賺到資產所產生嘅利潤。不過如果投資嘅過程當中，資產價格因為經濟下行嘅原因而急挫，手上高價買入嘅資產可能被迫低價出售，變成高買低賣，咁就會損失慘重，甚至高價買嘅資產變成「負資產」，需要抬錢賣貨。由此可見，財務規劃好重要，投資者唔應該借入高風險債務，然後盲目跟風投資，更需要睇實個市，及時對市場嘅變化作出反應。