九人的士
(由九人車跳轉過嚟)
九人的士係香港一種的士，1960年代初規定呢種的士最多可以載九人出入新界，所以又叫新界九人的士。呢種車頭有半圓牌，類似家下香港的士，寫住TAXI 9 SEATS，所以中文名叫九座位的士。政府規定，車身要打橫油一條長條，係上下兩行，黑白格仔相間[1]。
六七暴動
[編輯]六七暴動嗰陣，香港有唔少巴士停駛。行開新界嘅九人的士，乘機去市區兜生意。有一啲揸開九座位私家車嘅司機，就擅自轉做九人的士。重有啲客貨車，改裝做客車嘅貨車，都紛紛加入。佢哋響各交通要點載人。佢哋價錢係比巴士多一到兩倍，亦成為小型巴士，即小巴嘅前身。香港政府因為當時動亂環境，隻眼開隻眼閉，由得佢哋做生意。
之不過呢種生意係非法嘅，而且成日響大街路口，同巴士站，電車站等客，阻塞交通。
轉成小巴
[編輯]1967年末，香港政府見大局平定，交通開始回復正常，打算取締九人的士之類小巴。但由於呢類車有一定吸引，香港市民亦有聲音叫唔好取締，應該發牌管理。香港政府衡量過意見之後，1969年6月13號公佈，會將小巴分成兩類，一類叫公共小型巴士，即係家下叫開嘅小巴。另一類叫私家小型巴士。前者可以響街兜客收錢，至多可以載14人，除咗有限制嘅地方，去邊度載客都得，但有等別規管。後者唔可以響街兜客，呢啲通常係校巴，或者私家巴士。
呢個計劃，當時的士商會反對，不過最後立法局三讀通過，成為法例。
自此，公共小型巴士就取代咗九人的士。