以撒

以撒
1642 年一幅油畫，描繪年老嘅以撒將祝福賜俾佢個細仔雅各。
原文名	יִצְחָק‎
配偶	利百加
仔女	以掃（大仔）同雅各（細仔）
父母	亞伯拉罕（父）同撒拉（母）

以撒（希伯來文：יִצְחָק | 英文：Isaac）係亞巴郎諸教嘅人物，希伯來聖經同舊約聖經有提及。佢係族長亞伯拉罕之子，利百加嘅丈夫，以掃同雅各嘅阿爸。根據聖經記載，以撒年紀好細嘅時候，亞伯拉罕因為聽從上帝嘅命令，爭少少就用咗佢嚟做獻畀上帝嘅祭品。

以撒獻祭

爾幅油畫，描繪亞伯拉罕撳住以撒，準備用以撒做祭品。

内文：以撒獻祭

以撒獻祭係《創世記》入面一個重要嘅故事。根據創世記第二十二章，上帝想試驗亞伯拉罕嘅信心，就吩咐佢帶住自己嘅獨生仔以撒去摩利亞山做燔祭。亞伯拉罕遵命帶住以撒上山，準備將以撒殺死嚟獻俾上帝。喺臨落手嗰一刻，上帝嘅使者阻止亞伯拉罕，並且提供一隻公羊代替以撒成為祭品。

依個故事後來成為猶太教、基督教同伊斯蘭教共同嘅神學傳統，象徵住信心、順從同上帝嘅憐憫。

同利百加結婚

依幅畫，畫緊想像中愛好和平嘅以撒。

睇埋：利百加

喺《創世記》第二十四章。當時講到亞伯拉罕年紀好大，希望以撒可以早日成家立室，同時亞伯拉罕又唔想俾以撒娶在地（迦南）嘅女子做老婆，於是佢就吩咐屋企最年長嘅僕人返去佢本鄉，幫以撒搵新娘。僕人返到亞伯拉罕鄉下，到達城外嘅一個水井。佢祈求上帝嘅指引，噉講：如果有位少女，唔單只俾水佢飲，仲主動幫佢啲駱駝打水嘅，就以此為記號。

過左冇幾耐，利百加出現，仲跟足個記號：利百加一見到個僕人，就俾水佢飲，跟住仲為佢成群駱駝打水。僕人認定依個係上帝嘅指示，於是就拜訪利百加屋企，表明來意。利百加在場嘅多位屋企人，包括佢阿媽同阿哥，都同意依場婚事，而利百加亦表態願意即刻起行。隨後利百加跟隨僕人返到迦南，嫁咗俾以撒。

創世記第二十四章最尾係講，以撒非常鍾意利百加，而且因為佢阿媽（撒拉）當時啱啱過咗身冇幾耐，娶到心儀嘅新娘令以撒心靈得到慰藉。

祝福之爭

睇埋：雅各與以掃

根據《創世記》記載，以撒同佢老婆利百加生咗一對孖仔：大仔係以掃，細仔係雅各。以掃係打獵嘅人，深受以撒鍾愛；而利百加就偏心雅各。以撒晚年嘅時候，年紀老邁，雙眼昏花，打算將長子祝福傳俾以掃。不過利百加同雅各設計，叫雅各著上以掃啲衫，冒充阿哥去見以撒。以撒因為視力唔好，分唔清楚，最後錯誤噉將祝福傳咗俾雅各。

依件事成為雅各同以掃兩兄弟不和嘅原因。不過，及後兩人和好。喺創世記第卅五章有記載，兩人喺以撒過身嗰時再見面，而且仲一同安排父親嘅喪事。

人物特質

以撒喺聖經入面嘅形象，一般都覺得係一個相對好和同安靜嘅人物。講佢嘅故事通常都冇乜衝突，除咗佢年輕嗰時嘅獻祭事件，大部分有佢嘅情節都圍繞住講佢務農、打井同埋維護家庭嘅安定。

家庭

• 父：亞伯拉罕；母：撒拉
• 妻：利百加
• 仔：以掃、雅各

睇埋

• 亞伯拉罕
• 創世記
• 以色列人

外拎

• （香港繁體）第六講 以撒嘅順服