俄羅斯史
(由俄羅斯歷史跳轉過嚟)
俄羅斯史由東斯拉夫人開始，亦都係之後嘅俄羅斯人、烏克蘭人同白俄羅斯人。基輔羅斯係東斯拉夫人建立嘅第一個國家。喺988年開始，東正教從拜占庭帝國傳入基輔羅斯，拉開咗拜占庭同斯拉夫文化嘅融合，最後形成咗俄羅斯文化。13世紀初，基輔羅斯畀蒙古人佔領之後，分裂成好多個國家，呢啲國家都自稱係俄羅斯文化同地位嘅正統繼承人。
13世紀以後，莫斯科慢慢成為咗原先基輔羅斯文化嘅中心。16世紀中期嘅伊凡四世時代，莫斯科大公國改名做俄羅斯沙皇國。到18世紀彼得大帝時代，已經變成咗俄羅斯帝國，佢嘅國土好大，從波蘭橫跨到太平洋。1861年，俄羅斯廢除農奴制度，之後農民越嚟越多，土地嘅需求亦都越嚟越大，加大咗革命嘅壓力。從廢除農奴制度去到1914年第一次世界大戰爆發之間，俄羅斯推出咗斯托雷平改革、1906年憲法同埋國家杜馬，改變咗經濟同政治狀況，不過沙皇都係唔想放棄獨裁統治。
打仗同食物短缺喺1917年引發徂兩次革命，分別係二月革命同十月革命。十月革命之後，布爾什維克登上咗權力嘅舞台，建立蘇俄。1922，俄羅斯、烏克蘭、白俄羅斯、外高加索聯邦組建蘇聯。二戰之後，蘇聯慢慢變成一個超級大國。但係隨住經濟同政治體制嘅缺點嘅矛盾越嚟越大，於是蘇聯喺1991年解體。
1991年之後，俄羅斯聯邦繼承蘇聯喺國際事務嘅地位。不過，俄羅斯已經唔再係超級大國。去到今日，俄羅斯嘅政治同經濟結構都重有沙俄同蘇聯嘅特點。