大王爺廟 (元洲仔)
元洲仔大王爺廟係香港一座廟，喺新界大埔區元洲仔，鄰近現時嘅前政務司官邸，喺清朝中葉起。大王爺廟係大埔嘅一座水神廟，大王爺係王爺神，亦係昔日大埔啲鶴佬漁民敬奉嘅鄉土神、水神。隨住地方發展，元洲仔已經變嗮，再冇艇戶棚屋，漁民大多已搬入高樓大廈，但係鄉民仍然敬神不絕。每年嘅農曆五月初六開始（正誕在初八），係大王爺誕，喺天后宮前風水廣場就有神功戲賀誕，各個花炮會同信眾，都會喺呢幾一啲嚟到戲棚神壇參拜，係大埔區嘅一大盛事。其中部份嘅花炮會，為咗方便村民信眾，選擇喺周日舉行慶祝活動。
歷史
[編輯]大王爺嘅前身，係深圳河北岸嘅赤尾村村民，喺清朝中葉期間，元洲仔北岸就楝咗一塊碑石，附近嘅水陸居民往往向住呢塊碑文燒香祝禱，認為佢好靈。就係咁到咗清朝末年，由大埔五姓嘅漁民發起募捐（五姓分別係蘇、徐、李、鍾同石）。佢哋組成「僑港惠陽蘇徐李鍾石姓宗親聯會」，喺現址移碑起廟。間廟喺1988年曾經起過，2014年又由大埔五姓嘅漁民籌款再起過。
神誕
[編輯]喺1930年代開始，每逢農曆二月初五、二月十五同五月初六，大王爺廟都會慶祝大王爺誕，其中五月到初六起就會搭棚演粵劇同埋白字劇，神棚設喺汀角路「風水廣場」近大元邨，重有巡遊同埋抽花炮等活動，初六稱做「請神」，初八係「正誕」，直到十五朝早至送神回廟，係大埔區水陸居民一大盛事。
鶴佬賀誕係具特色嘅傳統活動。醒獅部分除咗一般嘅龍獅外，重有鶴佬麒麟、客家麒麟、金獅同貔貅，合共三十幾種動物。其中鶴佬麒麟，舞動者隨住鑼鼓嗩吶嘅伴奏樂聲，大動作噉不停轉，好似民間音樂表演咁。現場重有功夫表演。隊伍由集合地點嘅大元邨泰欣樓，遊行穿過大埔新市鎮嘅街道，走至風水廣場，令沿途市民都感受到節日嘅氣氛。
另外一個節目係婦女表演傳統風俗嘅陸上扒龍舟。婦女戴住自製嘅頭飾服裝，喺鬧市遊行表演，亦有人大聲高歌，表演傳統鶴佬歌曲。神功戲方面，除咗粵劇外，亦有潮劇地方戲曲嘅白字戲。但抽花炮活動就唔係喺同日進行，而係定喺農曆五月十三嘅神功戲中舉行。