八王之亂
八王之亂，係西晉元康元年（291年）至光熙元年（306年）所發生嘅政治鬥爭，係中國歷史上一場非常嚴重嘅皇族內亂，前後一共持續16年。
八王包括：
但係有份參與嘅藩王唔止呢八位。
時序[編輯]
290年四月，晉武帝過身，之後由太子司馬衷繼位，就係晉惠帝。楊太后阿爸楊駿輔政。有人向楊駿舉報，話汝南王司馬亮想起兵討伐佢，於是楊駿通過惠帝出手詔叫士兵討伐汝南王，但係啲部下收到之後無去行動。而另一邊，有人叫汝南王起兵討伐楊駿，汝南王唔敢，於是漏夜走去許昌避難。[1]
楊駿被殺[編輯]
楊駿主政後，有好多人唔滿意佢嘅作風。晉惠帝皇后賈南風派李肇聯絡汝南王起兵討伐楊駿，汝南王冇應承到。李肇又搵楚王司馬瑋，楚王好爽快咁應承咗。291年三月，賈后一黨行動，由惠帝出詔書廢咗楊駿嘅權，楊駿聽到有事發生，叫啲官員去佢府上商議，但係決定唔到跟住點做，啲士兵去到楊駿大宅，楊駿被殺。楊駿兩個細佬、一啲同楊駿相關嘅官員加埋佢哋親屬都被殺，死者有成幾千人。之後楊太后都被廢。[1]
汝南王、楚王被殺[編輯]
楊駿死後，由汝南王同衛瓘輔政。佢哋兩個想收返楚王兵權，得罪咗楚王。291年六月，賈后通過惠帝出手詔畀楚王，叫楚王免去汝南王同衛瓘嘅官，於是楚王就去行動，汝南王同衛瓘兩個都冇反抗，就咁被處死。之後賈后就想鏟除楚王，於是又通過惠帝話楚王假傳聖旨，於是啲軍隊就唔再聽楚王指揮，而楚王就畀人拉咗同行刑處死。[1]
之後嗰8年相對平靜。
賈后被殺[編輯]
太子司馬遹唔係賈后生嘅，賈后就想害佢。299年十二月，賈后設局陷害太子司馬遹，搞到太子被廢。啲人對於太子被廢好不滿，有人想幫太子復位，走去搵趙王司馬倫嘅親信孫秀，孫秀同趙王講，趙王應承咗參與。但係之後孫秀又同趙王講，太子係聰明人，幫太子復位之後太子都唔會由得人哋擺佈，仲因為趙王係賈后一黨，第時依然有機會畀太子算帳，不如等賈后殺太子，之後就廢咗賈后，幫太子報仇，到時就係自己話事，趙王同意咗。之後孫秀設局令到賈后喺300年三月殺咗司馬遹。300年四月，趙王發動廢后行動，派齊王司馬冏帶兵入宮廢咗賈后。之後趙王搵人送毒酒賜賈后死。[2]
趙王被殺[編輯]
300年十一月，惠帝立羊氏做皇后。
301年正月，趙王迫惠帝禪位畀佢。301年三月，齊王起兵討伐趙王，又派人聯絡成都王司馬穎、河間王司馬顒、常山王（以前由長沙王改封）司馬乂等人。成都王喺鄴起兵，有好多人響應佢，好快就有成二十幾萬人。河間王起初係支持趙王嘅，但係之後睇見反趙王嗰邊好強，於是就改投反趙王嗰邊。趙王軍形勢不利，301年四月，左衛將軍王輿同其他人帶兵入宮，殺咗孫秀，迫趙王退位，立番惠帝做皇帝。跟住趙王就被賜死。由起兵以嚟過咗六十幾日，有成將近10萬人戰死咗。301年六月，齊王冏大軍進入洛陽，有成幾十萬人。[3]
齊王被殺[編輯]
301年七月，改封常山王司馬乂做長沙王。
齊王主政之後，表現令到好多人失望。302年十一月，河間王派兵討伐齊王，又叫長沙王對付齊王。十二月，齊王收到河間王聲討佢嘅文，之後齊王派兵攻打長沙王，經過三日激戰，齊王軍打輸咗，齊王畀手下捉住向長沙王投降，之後長沙王下令處死齊王。[3]
長沙王被殺[編輯]
303年八月，河間王出兵7萬，成都王出兵二十幾萬，由西、北兩邊一齊攻打長沙王。304年正月，東海王司馬越同一啲將領捉咗長沙王，之後東海王派人通知河間王嘅將領張方接收長沙王，之後張方就將長沙王燒死。之後由成都王做丞相。[4]
成都王、河間王被殺[編輯]
304年二月，喺成都王推動下，羊皇后被廢。同月惠帝立成都王做皇太弟。七月，東海王同埋其他人發起討伐成都王嘅行動，重新立番羊氏做皇后。東海王帶住惠帝北上討伐成都王，去到安陽已經集合咗十幾萬軍隊，成都王派出5萬人迎戰，喺蕩陰打敗咗東海王大軍，東海王軍揼低惠帝，結果畀成都王軍帶返鄴。河間王派張方率兵2萬救成都王，當成都王打贏仗之後，張方軍就改為進攻洛陽，並且打敗守洛陽嘅上官已，之後廢咗羊皇后。[4]
之後成都王畀王浚打敗，帶住惠帝由鄴走佬去洛陽。同年匈奴人劉淵自立為漢王。
張方帶住惠帝同成都王走去長安。之後惠帝立番羊氏做皇后。304年十二月，改立豫章王司馬熾做皇太弟。[4]
305年四月，張方廢咗羊皇后。七月，東海王號召其他地方同佢一齊討伐河間王。
河間王本來同意畀惠帝返去洛陽，換取同東海王講和，但係張方反對。306年，河間王殺咗張方，佢以為張方死咗之後東海王就會同佢講和，但係東海王唔肯。之後東海王一方嘅軍隊攻入關中，接返惠帝返洛陽，復立番羊皇后。
306年九月，成都王喺前往會合公師籓嘅途中畀頓丘太守捉住，將佢交畀范陽王司馬虓。十月，范陽王過身，佢嘅下屬就假傳詔命賜成都王死。十一月，惠帝中毒死，之後由司馬熾做皇帝，就係晉懷帝。十二月，東海王發詔書畀河間王，叫佢去洛陽做司徒，河間王起程，喺途中畀南陽王司馬模派人殺死。[5]「八王之亂」結束。
