公園
公園係園一種，戶外一大塊有唔少植物嘅地，留畀人康樂之用。公園係西方引入嘅概念，英文叫park，意思係一塊圍咗嘅地，裏面養咗啲野生動物，畀人打獵用。後尾引伸到住宅區附近有大自然嘅地，裏面有野生動物，又可以畀人行山、騎馬。後尾又引伸到市區附近或者裏面留一大塊地，特登留畀大眾來玩，亦可以整靚個城市，呢個就係點解中文同日文譯做公園。
市區裏面嘅公園同花園係有啲似，而花園重點係放響種花種樹種植物，有時重會養埋動物。如果花園係開放畀大眾嘅話，呢個情況之下，公園亦都可以叫做花園，花園亦都可以叫做公園。
原本公園係養野生動物嘅地方，所以早期公園亦都譯做囿（讀又）。香港九龍嘅京士柏（英文：King's Park），以前就係譯做皇囿。
種類
[編輯]響基本定義之下，公園就可以分做兩種。一種就係野外公園，另一種係市區公園。
野外公園主要係保留大自然或者原有環境，就好似國家公園、森林公園、郊野公園、海岸公園之類。
而市區公園就可以根據唔同用處再細分。例如畀人認識下自然生物嘅動物園同植物園。又例如畀好多人一齊玩嘅大型遊樂場。又或者唔係有特別用途，有大塊地，畀人休息，畀大人細路活動下嘅公園。又或者細塊啲畀人坐下行下玩下嘅公園仔，裏面多數有兒童遊樂場。而主題公園就係有特定主題嘅大型遊樂場。
公園因應唔同目的有好多唔同種類，好多時都會夾埋唔同設施，所以種類可以數都數唔晒。