分飛燕

出自維基百科,自由嘅百科全書
分飛燕(囑咐話兒莫厭煩)
甄秀儀陳浩德
收錄喺專輯《一切太美妙》
發行日期1973年
粵語流行音樂
時長03:00
唱片公司麗歌唱片
作曲佚名
編曲黎小田

分飛燕》係一首經典粵語流行曲,屬於粵曲小調。蘇翁用廣東傳統古曲《楊翠喜》,填詞得來。初時唔係呢個名,叫做《囑咐話兒莫厭煩》。第一個唱嘅歌手,係甄秀儀同埋陳浩德,收錄响甄秀儀1973年香港發行嘅專輯《一切太美妙》(麗歌唱片/百代唱片,S-LRHX-001)入面。《分飛燕》响香港、廣東、東南亞等講粵語嘅地方都有好多人傳唱;日後有好多歌星翻唱過。

根據原唱歌手陳浩德回憶,嗰時香港嘅流行曲,大部份係唱英文,或者唱國語。粵語流行曲俾人話老土,地位低一截;但似乎都有市場。甄秀儀當時就已經出過幾張唱片,不過全部都係國語歌。佢想試出張粵語流行曲唱片,入面就有呢首歌。原本係甄秀儀獨唱,後來因為負責編曲同配樂嘅黎小田,同甄秀儀用電話溝通時搞錯個Key,錄音時先發覺唱唔到;臨時決定改做男女對唱,搵陳浩德唱男聲。[1]

《分飛燕》嘅風格,仍然有好重粵曲成份。曲本身就係傳統粵曲小調。詞嘅題才,亦係粵調常見嗰種歌女嘆分離。歌詞係文言為主,但冇用「哥、妹、君、卿」呢類咁隱晦暗嘅代語詞。用詞反而相當白話。冇套用典故,但亦冇用廣東話口語。用時代曲常用嘅西樂伴奏編曲;兩個歌手,亦唔係唱開大戲,係時代曲底。發行之後,好受歡迎。所以有人話,《分飛燕》係第一次香港人唱嘅廣東歌,嚮香港受各階層皆歡迎,擺脫當時粵語曲地位低過國語曲嘅諗法。呢首歌,係70年代粵語流行曲响香港開始大放異彩嘅先聲[2]

70年代,有好多歌星翻唱《分飛燕》,仲係收入作品專輯嗰種;證明呢首歌幾多人鍾意。填詞人黎彼得1977年惡搞「分飛燕」,二次創作,將佢改成為《新區自嘆》。用抵死啜核地道嘅廣東口語,寫當時香港新區治安惡劣,由張武孝(大Al) 主唱。

參考[編輯]

  1. 浩德2017年6月專訪. . 喺2020-04-28搵到.
  2. 黃志華 (2014-03-24). . 信報.

出面網頁[編輯]