剪燈新話

《剪燈新話》係一部明朝時期瞿佑寫既奇幻小說集，全書總共有4卷21段。根據自序，原本既書名係《剪灯録》。

《剪燈新話》繼承咗六朝志怪同埋唐朝既傳奇傳統，喺公元1379年（明朝洪武十一年）已經有抄本，去到公元1418年（明朝永樂十五年），瞿佑喺保安州重新校對咗《剪燈新話》，喺當時好受歡迎，不過後來成為禁書，然後喺中國失傳咗。

日本喺慶長、元和年間重印咗4卷20篇加上1個附錄，總共有21篇。喺1725年完成既《古今圖書集成》，將《寄梅記》加入到《閨媛典》（第13卷），現存既全書4卷，每卷5個故事，加上2個附錄，總共22個故事。

1917年董康再根據日本藏本翻刻，成為我哋依家睇到既版本。

影響

公元1420年（明朝永樂十七年），李昌祺模仿《剪燈新話》創作咗《剪燈餘話》。

公元1592年（明朝萬曆二十年），邵景詹寫既二卷八篇傳奇小説集《覓燈因話》，亦都受到《剪燈新話》既影響。

《剪燈新話》、《剪燈餘話》、《覓燈因話》三本書合稱「剪燈三話」，係明朝文言短篇小說既代表作，直到清朝蒲松齡寫既《聊齋誌異》先至有傳奇小說可以媲美。

喺日本上田秋成寫既《雨月物語》，喺朝鮮國金時習寫既《金鰲新話》，喺安南國阮嶼寫既《傳奇漫錄》等，都係受到《剪燈新話》既影響。

「剪燈三話」好多古仔都係描繪社會唔太安定既背景下既愛情故事，展現咗戰爭、不公同埋社會動盪帶俾平民百姓既災難，通過愛情故事，將人物既命運同埋政治背景連繫起嚟。

《剪燈新話》裡面既《翠翠傳》、《愛卿傳》、《秋香亭記》、《三山福地志》等；《剪燈餘話》裡面既《彎鶯傳》、《月夜彈琴記》等既古仔都係用呢種手法。

例如《愛卿傳》係以元末戰亂頻繁、生靈塗炭做故事背景，用曲折動人既虛構情節，寫出悲歡離合既愛情故事。