文創產業發展處

文創產業發展處（英文：Cultural and Creative Industries Development Agency (CCIDA)），前稱創意香港，係香港文化體育及旅遊局轄下嘅辦公室，專責推動香港創意產業嘅發展，喺2009年6月1號成立。因應政府架構重組，創意香港辦公室由2022年7月1號起撥歸新設立嘅文化體育及旅遊局。2024年6月14號改名做文創產業發展處。

服務

廣告

資助多個項目，支援廣告業喺數碼年代應對挑戰同把握機遇，包括「微電影『創+作』支援計劃(音樂篇)」、「香港初創數碼廣告企業Ｘ出版宣傳支援計劃」、「數碼廣告業新畢業生支援計劃」等，協助初創同中小型廣告製作公司發展，並為廣告業培育新血。

建築

資助嘅「港深城市／建築雙城雙年展(香港)」同「威尼斯國際建築雙年展香港展」，係展現香港建築創意嘅重要平台，為香港建築師帶嚟環球機遇。

設計

每年資助業界舉辦「設計營商周」、「deTour」、「DFA設計獎」、「Fashion Asia Hong Kong」、「Centrestage」等盛事，亦資助「設計創業培育計劃」、「時裝創業培育計劃」、「Redress Design Award」、「香港智營設計大賞」、「PMQ Seed」等項目，為業界培育或發掘人才同建立品牌，以及喺社區同學校層面推廣設計思維。

數碼娛樂

資助業界推出「動畫支援計劃」、「香港遊戲優化和推廣計劃」、「『港漫動力』－香港漫畫支援計劃」、「香港數碼娛樂業新畢業生支援計劃」等項目，以培育人才同協助初創企業發展。資助嘅「香港漫畫星光大道」，唔單止係全球首條以漫畫為主題嘅星光大道，亦係香港重要嘅地標之一。

電影

為唔同項目提供資源，包括資助「香港國際電影節」，通過「電影發展基金」為香港中低成本嘅電影製作提供部分融資，資助「香港影視娛樂博覽」、「香港電影金像獎」等盛事，還推出「首部劇情電影計劃」、「薪火相傳計劃」、「劇本孵化計劃」等項目以培育新一代電影工作者。多年嚟協助電影嘅製作，特別係喺香港拍攝外景嘅工作，並喺政府層面為業界向內地爭取更多措施，便利香港電影同電影從業員進入內地市場。

大灣區／一帶一路

為支持香港創意產業參與國內大循環同開拓國際市場，資助香港各創意界別到大灣區其他城市同一帶一路國家舉辦展覽、交流活動等，或同大灣區其他城市合辦唔同項目。「創意香港」亦組織業界到呢啲地區考察，或喺當地舉辦巡迴展覽，推動跨地域創意產業交流同合作。

音樂同電視

資助「《埋班作樂》音樂創作及製作人才培育計劃」同「搶耳音樂」品牌下嘅唔同項目，讓香港新一代音樂創作人同音樂廠牌得到支援同啟發，喺創作更多作品之餘，亦積極開拓境外市場。

印刷同出版

多年嚟資助喺內地同歐洲大型書展中設立「騰飛創意－香港館」，以協助印刷同出版業界開拓市場，並資助出版界嘅「想創你未來－初創作家出版資助計劃」、「香港出版雙年獎」、「香港智能電子書庫」，分別培育香港新進作家、表揚香港出版嘅優秀華文出版物同鼓勵業界轉型。

特別效果牌照

電影服務統籌科特別效果牌照組專責對電影、電視、廣告片製作同演唱會、舞台、主題公園表演中使用嘅特別效果物料作出規管，以及簽發燃放特別效果物料許可證，讓業界可以僽合適嘅環境下製造特別效果，令到各式各樣嘅娛樂項目同活動得以順利進行，促進創意產業嘅發展。

出面網頁

• 文創產業發展處嘅官方網站
• YouTube上面嘅文創產業發展處嘅頻道