動物福利
 |
動物福利呢個概念一般係指，動物（尤其係受人類控制嗰啲）無論係俾人當係食物、工作工具、友伴或研究需要，都唔應該受到不必要嘅痛苦。呢個立場建基於人類所做作（或唔做）嘅行為需要有相當嘅道德情操，而唔係好似動物權益者咁樣，將動物嘅地位係政治同哲學方面追尋更大嘅權益。唔少動物福利團體喺佢哋嘅聲明上好鍾意用「人道／仁愛」呢啲字眼。
起源
[編輯]最早對動物嘅福祉提出有系統嘅諗法，相信係古代印度河流域文明。佢哋嘅宗教思想認為祖先會輪迴以動物形態返回現世，所以應尊敬待動物如尊敬人一樣。呢種思想被耆那教進一步發揮，及被其他印度宗教所採納。其他根源於亞伯拉罕諸教嘅宗教，就普遍視動物為人嘅財產，並對動物嘅照顧同屠宰訂下規則，以減少喺人類控制下嘅動物承受焦慮、痛苦同恐懼。
實踐
[編輯]1822年起，英國國會議員李察馬田喺國會倡議設立草案，防止虐待牛、馬同綿羊，佢嘅理論係要顯示人類嘅仁愛同和仁慈嘅行為。馬田喺1824年重成為防止虐待禽畜會嘅創辦人之一。1840年，維多利亞女皇賜個會「皇家」稱號。嗰個會透過會員嘅捐助，請咗大批調查人員，搵出虐待動物嘅人，搜集證據，向執法機構舉報。
同類組織亦喺歐洲同美國相繼出現，例如美國防止虐待禽畜會就係喺1866年喺紐約州註冊。
原則
[編輯]1965年，英國政府為回應社會訴求，就委任Roger Brambell教授對農場動物嘅福利事宜進行研究。根據呢個研究結果，喺1967年成立「農場動物福利諮詢委員會」（1979年改組為農場動物福利委員會），呢個委員會提出動物都會有渴求「轉身、弄乾身體、起立、躺下和伸展四肢」嘅自由。確立咗動物福利嘅「五大自由」：
- 免受飢餓、營養不良嘅自由
- 免於因環境而承受痛苦嘅自由
- 免受痛苦及傷病嘅自由
- 表達天性嘅自由
- 免受恐懼同壓力嘅自由
比較動物福利同動物權益
[編輯]絕大部份動物福利倡議者都覺得，動物權益嘅主張「走得太遠」，唔認同後者要求全面廢除寵養動物同勞役動物，如動物測試、實驗等等。佢哋相信人類喺萬物之靈，有道德責任唔去殘害動物，令動物受不必要嘅痛苦。動物權益倡議者（如Gary L. Francione同Tom Regan）就批評，動物福利觀嘅立場（如一方面提倡畀動物更好嘅生存環境，但又唔堅持禁止勞役動物）係自相矛盾，而且喺道德方面唔能夠接受。不過，唔少動物權益團體（如PETA）都支持改善動物福利，作為一種減少動物所受痛苦嘅短暫措施，但同時以禁止對動物各種形式嘅勞役作為終極目標。
動物權益倡議者論動物福利
[編輯]本身支持動物權益倡議者同動物解放嘅加拿大倫理學家David Sztybel指出，動物福利一共有六種[1]：
- 動物剝削者嘅動物福利：靠勞役動物經營嘅工業，佢哋嘅公關宣傳人員往往以搞動物福利嚟證明佢哋對動物好（如屠宰工業嘅發言人）；
- 常識所講嘅動物福利：大眾對防止以不人道措施對待同善待動物嘅關注；
- 人道主義嘅動物福利：一種較有理論基礎咁反對殘暴對待／虐待動物嘅主張，但就唔反對大部份勞役動物嘅做法（將動物剝皮做皮草或勞役動物作體育用途除外）；
- 動物解放份子嘅動物福利：基本上認為應將動物所受嘅痛苦減到最低，但同意為咗更大嘅福祉，如醫療研究等，可以係例外；
- 新動物福利主義：Gary L. Francione提出呢嗰概念，用嚟形容會一啲勞役動物嘅措施（通過呢啲措施最終可以達致全面禁止勞役動物）；
- 動物福利／權益混頓觀：當兩種概念難以分辨時
Sztybel喺佢本書"The Rights of Animal Persons"[2](2006)入面，批評話「動物福利」只係為人類係勞役動物作為人嘅食物、衣服、代人做實驗等傷害動物時，令人內心好過啲嘅半桶水方法，誤導人以為已經減輕對動物嘅傷害。佢認為只有動物權益得到確立，先至有真正嘅動物福利。
除咗Sztybel外，重有好多人討論動物福利。另外，唔少國家都訂立規例，落實唔同程度嘅動物福利。
批評
[編輯]有一部份人，否定動物有感受，所以亦冇所謂動物福祉嘅問題。另一批人則指摘，動物福利倡儀者往往將焦點集中喺某幾類動物，批評佢哋有物種主義傾向。
地域差異
[編輯]英國嘅動物福利倡議者比較關注，喺宰殺動物時盡量減輕動物嘅痛苦。呢種觀點並未被美國接受。另外，城市同鄉郊人對動物福利嘅睇法亦往往有顯注不同。
注
[編輯]- ↑ Sztybel, David. "Distinguishing Animal Rights from Animal Welfare." In Marc Bekoff (ed.). The Encyclopedia of Animal Rights and Animal Welfare, Westport, CT: Greenwood Publishing Group, 1998, pp. 130-132.
- ↑ Sztybel, David. "The Rights of Animal Persons," Animal Liberation Philosophy and Policy Journal 4 (1) (2006): 1-37.
連出去
[編輯]- Animal Welfare Science Centre Australia's Leading Animal Welfare Science Centre
- Brute Ethics: animal ethics encyclopedia
- Open Directory Project - Animal Welfare Organizations directory category
- US Library of Congress - Selected Internet Resources Animal Welfare, Companion Animals and Veterinary Science
- Power Point Slideshow about AR & Vegetarianism - Mirror where you can download it; with music; warning - some brutal scenes inside.
- Blue Cross of India - registered in 1964